坦克執教曼聯第一季，如果要簡單概括，就係以災難開始，以安慰作結。
先講講曼聯今季成績先
1. 英超
以75分排第三，比起上季排第六，攞多左17分，最重要當然係下季重返歐聯。不過聯賽全季只係攻入58球，雖然C朗季中離隊同馬斯亞長期倦勤，但以Big 6嚟講都係不能接受，講緊曼城係入左94球、阿仙奴88球、白禮頓都72球。
2. 歐霸
八強出局，又係輸西維爾，四線作戰當中最失望既一環。
3. 聯賽盃
係球隊六年第一個冠軍，雖然晉級過程並未受咩考驗，但無疑坦克定一眾球員同球迷都係好大鼓舞。
4. 足總盃
成功打入決賽，面對曼城就好似大衛挑戰哥利亞咁。即使結局唔同，但喺攻守都有主力缺陣之下，球員表現同精神面貌都值得加許，球迷都收貨啦
跟住回顧下今季既難以忘記同難以磨滅既時刻
1. 22年8月
「開季兩連敗，跌落榜尾」
揭幕戰意外輸1:2比白禮頓，第二場仲恥辱性比賓福特太炒0:4。好彩第三知恥近乎勇，2:1擊敗當時同樣喺榜尾掙扎既利物浦。
2. 22年10月
「曼市打吡慘敗」
本來以為曼聯近況回勇，有力同曼城一戰，結果打吡變悲劇，半場已經落後4球，最後慘敗3:6。
3. 22年11月
「與C朗季中解約，分道揚鑣」
C朗高調接受摩根訪問之後，曼聯宣佈同佢解約，佢亦隨即轉戰沙特球會艾納斯。自此，曼聯球迷分成兩大陣營，撐朗派同反朗派甚至嘈得激烈過同市死敵。
4. 23年1月-2月
「連戰皆捷，勇奪六年首冠」
一眾曼聯球員喺世界盃完結之後，都keep住有好表現。福仔更加贏得呢兩個月既英超Player of the Month，當中2月更係同領隊坦克雙喜臨門。去到2月尾曼聯亦擊敗紐卡素，贏得聯賽盃冠軍，令坦克執教生涯有個好開始。
5. 23年3月
「雙紅會慘敗」
唔知係咪班球員捧完盃之後，仲係holiday mood搞到無心戀戰。曼聯作客晏菲路被屠殺0:7，創下史上最大敗仗羞恥紀錄，更加係今季第三次被對手大炒。
6. 23年5月
聯賽不過不失，決賽力戰而敗
曼聯喺5月初連續兩場聯賽失分，瞬間令爭四變讓四，好彩最後都拎倒個第三。至於賽前幾乎冇人睇好既足總盃決賽，輸得有尊嚴已經有交代。
總括嚟講，曼聯今季可以話完成左基本任務: 守住前四，重返歐聯。本以為又係四大皆空既一年，總算有個聯賽盃冠軍做安慰獎。
來季展望
1. 清洗球員，籌集轉會資金
除左已經約滿離隊嗰幾個之外，仲有外借回歸既拜利同泰利斯，麥佳亞、甸軒達臣、雲迪碧克、艾蘭加、柏列斯查，or even 費特、麥湯文尼，有適合報價既，清得就清。
2. 補充球員，應付多線作戰
當Big 6都陸續簽新球員，曼聯仲係得個吹字，令人擔心。隨住韋賀斯、沙比薩、畢蘭都不獲續借，中鋒、中場、龍門，都係曼聯補強首要目標。雖然暫時d報價都唔太順利，希望呢個轉會窗唔好panic buy，唔好deadline fight。大家繼續mon實Fabrizio大佬啦。
