曼聯球迷最憎邊個，以往大多都係死敵既當家球星(謝拉特)，或者曾經效力過但同球隊不歡而散既叛徒(泰維斯、迪馬利亞)。但如今你問曼聯球迷頭號敵人係邊個，相信答案都不外乎係「隊長」、「80m」、「麥麥送」。場上表現強差人意，所以就比眾多球迷恨之入骨？唔止咁簡單。
麥佳亞今季交出災難級表現，係不爭既事實。1on1逢人就比人過、走漏對手、失位同隊友碰撞、魯莽出腳攔截、立亂衝前標波、包越位，總括而言就係多不勝數既犯錯，數之不盡既失誤。2019年，麥佳亞由李斯特城高價轉投曼聯，曾經係解決後防問題既關鍵。如今佢變成問題癥結，球隊打法上既改變，就係導致佢一落千丈既原因。李斯特城採用低位防守，只要求中堅擅於應付高波。防線密集，加上同龍門距離近，就算佢轉身有幾慢，對手進攻球員根本冇空間爆過佢，稍有甩漏亦都有隊友迅速補位。麥佳亞既優點得以彰顯，缺點得以掩蓋，自然踢得如魚得水。相反，曼聯採用高位防守，防線要上前壓迫對手，就將佢轉身緩慢、速度欠奉、反應遲鈍等弱點表露無遺。身為球隊後防領袖，失誤多如繁星，自然淪為球迷笑柄。
麥佳亞身價高達8000萬英鎊，亦係佢被抨擊得最緊要既地方。當然有人覺得唔應該用price tag去定義一個球員，但球員身價同球迷期望好多時都直接掛勾。曼聯防守弱不禁風，其實麥佳亞既後防拍檔同樣難辭其咎。相比之下，邊路位置感弱，經常失位既迪利斯同達洛特，球迷就顯得寬容得多。一個80m，另外兩個分別20m唔使，三人身價上既分別，正正解釋倒大家取態上既差異。肩負住歐洲頂級中堅既身價，踢出嚟既卻係英冠守衛水平，又點會逃得過被譏笑既命運。
無論麥佳亞表現何其差劣，依然坐擁正選位置，穩守隊長一職，本來已經惹嚟好多曼聯球迷討厭。佢喺比賽中三番四次大出洋相，防守時mark錯梳爾、角球爭頂撞倒C朗、虎尾腳踢傷普巴，仲有no look defending。儘管佢喺場內點樣丟人現眼，場外佢都毫無反省自責。入波之後掩住耳仔滑跪剷草慶祝，甚至喺訪問否認自己表現欠佳。稍有作為就即刻意氣風發，更令球迷感到羞家。
曼聯今季成續低迷，令球迷失望、絕望、唔再期望。球隊表現一敗塗地，當然唔止係個別球員問題。咁點解麥佳亞係戰犯，係眾矢之的，係最乞曼聯球迷憎嗰個？多人憎，唔單止因為佢廢，仲係因為佢廢得嚟好醜，令你睇落佢更加廢。天價後防大將，卻時時醜態百出，出醜之後仲要涎皮賴臉，先係麥佳亞最乞曼聯球迷憎既原因。
#ngsickball x @redunited.hk