人稱「前鋒華」既曼聯後防名宿艾夫拿，對球迷嚟講應該一d都唔陌生，例如佢中過C朗雞胸既伏，係朴智星既好兄弟，同埋比蘇亞雷斯種族歧視，仲有效力馬賽既時候起飛腳自己球迷等。法國藉既佢，喺塞內加爾出世，司職左閘，佢喺2006年1月由摩納哥加盟曼聯，係曼聯近年最出色後衞之一。
06-07球季，係24歲既艾夫拿喺曼聯既debut season。當時正選左閘軒斯飽受傷患困擾，因此艾夫拿一加盟就有唔少上陣機會，喺球隊亦逐漸站穩陣腳，慢慢進佔正選位置。佢踢法攻強於守，係當時少數以進攻為主既閘位球員。踢順腳左閘既佢，擅長側擊傳中，有良好傳球視野，速度飛快，體能優異。佢work rate同攻守覆蓋率都係上乘，仲係勤力得嚟又有球商既後防大將。佢具備截擊能力同補位意識，有着強壯體格，單防單防守都毫不輸蝕。就算得1米73，佢制空力都唔算差。憑着亮眼表現，即使全季只係上陣左24場，艾夫拿依然入選英超PFA Team of the Year。
之後艾夫拿就成為曼聯攻守方面都不可或缺既主力。佢亦develop新技能，擔當角球戰術進攻點，不過唔係斬波，只係入楔接應傳中頂頭槌嗰個。 09-10球季，佢更加喺英超38場賽事全勤，仲首次以曼聯隊長身份捧走聯賽盃。佢效力曼聯呢段時間，贏得五次英超(06-09、10-11、12-13)，同埋一次歐聯冠軍(07-08)，仲有幾個本土盃賽，同隊友合力造就球隊輝煌盛世。
可惜喺2014年7月，艾夫拿決定尋求新挑戰，結束九年紅魔鬼生涯，轉投祖雲達斯。離隊之際，佢多次感謝傳奇領隊費sir信任同教導，費sir都盛讚佢獨特既領袖氣質。之後佢曾經回歸法國效力馬賽，再重返英超加盟韋斯咸，最後喺2019年以38歲之齡，為職業生涯畫上句號。
退役之後，艾夫拿仍然非常關注曼聯近況，佢Instagram關於舊東隊既posts多不勝數。最為人津津樂道既，就係喺曼聯贏左曼市打吡之外，拍片唱Don’t Look Back in Anger改詞版(主唱Oasis喺曼城球迷)慶祝。今季曼聯對陣阿仙奴同巴塞之前，佢都有向班師弟分享心得同為佢地打氣。佢亦一直支持領隊坦克，即使曼聯今季唔止一次經歷大敗，佢都鼓勵球迷要對佢保持耐性同信心，等佢帶領球隊重回正軌。
艾夫拿又經常發表賽後評論，一針見血咁指出球隊或球員既不足之處，例如肯定般奴球技既同時，勉勵佢要改下d乞人憎既脾氣同身體語言。比起唔少曼聯名宿，佢傾向理性批判，唔會玩私怨，都唔會嘩眾取寵。無論以前場內定而家場外，佢都毫不掩飾對球隊既熱愛，所以咪深得球迷歡心囉。
球員時代既艾夫拿為曼聯建樹良多，退役之後既佢，對球隊既愛都絲毫不減。佢好強調所有曼聯球員都有責任了解球隊歷史，因為咁先會有歸屬感，先會為着起呢件波衫而自豪，先會喺球場上付出所有。芸芸眾多曼聯名宿同舊將入面，佢都可以話係no.1 die hard fan，啫係一日係曼聯人，一世都會係紅魔鬼嗰隻。唔係點會離開左接近十年，都仲咁有心成日出post，同球迷同喜同悲。做球員嗰陣，為球隊立下汗馬功勞；做球迷嗰陣，對球隊堅決不離不棄，試問曼聯球迷又點會唔中意佢呢？