球迷一生，總有一個球員，令你全情投入咁愛上足球。有個生於曼聯輝煌年代既人，資質平庸，球技一般，偏偏係好多追隨者眼中既蓋世英雄。佢，就係阿倫史密夫。
佢係一個反叛不羈既後生仔，梳個mk金毛飛機頭，硬朗得嚟飛沙劈石，十足十漫畫主角咁。2004年既佢，年少氣盛但雄心壯志，決心要成為受萬人景仰既傳奇。佢喺曼聯既地標戰，係社區盾對阿仙奴。雖然曼聯1:3輸左，但佢射入一球世界波，然後就開展左人生既新一頁，準備迎接職業生涯既高峰，以「熱血紅魔」既形象，俘虜萬千球迷既心。
只係呢個漫畫主角既足球夢，並唔係一帆風順。當年曼聯鋒綫人才輩出，阿倫史密夫冇辦法爭倒一席正選位置。但費sir欣賞佢既熱血拼勁，毅然決意將佢改造成防守中場，接替堅尼鎮守曼聯中路。一剷、兩剷、三剷，無論跌低幾多次，都會爬返起身，直至剷走對方球波為止。就算佢唔再係鎂光燈下既焦點，仍然拼了所有，斷氣方休，仍然係打不死既「熱血紅魔」。
可惜阿倫史密夫不單止冇主角光環，仲係悲劇收場。2006年2月18日，大概係版主自有記憶以嚟，第一次為陌生人喊既日子。嗰日係足總盃對利物浦既賽事，嗰個勇字行頭，喺球場上下下去到盡既佢，奮不顧身咁擋住對手既勁射。一擋就脛骨骨折，一抖就抖足一年。呢一次去到盡，亦都令到佢既高峰去到盡頭。當時佢只係得26歲。
但係阿倫史密夫冇放棄到足球。重傷之後，佢黯然離開曼聯，去到紐卡素，繼續行佢既球員路。雖然交唔出預期既好表現，但熱血依舊，拼勁依然。輾轉之下，佢去到低組別聯賽，以球員兼教練既身份，喺綠茵場上從未停步。你睇倒佢星宿殞落，我睇倒佢發光發熱。
只可惜阿倫史密夫最後都唔能夠成為萬人景仰既傳奇。話咁快佢已經離開左曼聯十五年，亦喺三年前低調退役。不過佢一早就已經喺球迷心目中，留低左永不磨滅既印記。雖然佢既青春，一早就隨住時代巨輪，好似曼聯既盛世咁，慢慢逝去。人無千日好，花無百日紅。阿倫史密夫就係一朵紅玫瑰，喺綻放盛開之時，喺夢劇場刻畫左最美好既年華。
球迷一生，總有一個球員，令你全情投入咁愛上足球。從此之後，足球就成為左你生命中不可或缺既一部分。版主眼中既蓋世英雄，係曼聯一朵綻放盛開既紅玫瑰。佢個名叫做，阿倫史密夫。