熱刺 0-3 曼聯
大家好清楚，蘇斯克查除經典的4231外，另一個較常見的陣容便是532，所以隨住華拉尼復出，改打532尚算一個明智之舉。至少知4231中後場問題無法解決，改陣死馬當活馬醫。
經過一個星期的調整，在防守上有明顯的進步，球隊的532陣式，在防守時般奴會突前在右前鋒位置，變成325，做遮線及搶逼。今仗前線不再胡亂衝前壓迫，大部份時間縮到中圈前才會追人，球員之間見到有更多默契及溝通。加上，卡雲尼在前線勤力走動，防守積極性遠比華舒福及格連活為好。
當然，出一對加埋七十歲的前鋒組合，就別妄想打快速反擊，主要是組織滲透為主，球迷當然明顯這正是球隊的弱項，上半場在入球前，僅有費特一球遠射中龍。最後仍然要靠葡萄牙孖寶，一傳一射先開記錄。
下半場的發揮與上半場差不多，改踢532後，熱刺大部份時間無法撕破曼聯防線，只能靠死球突襲，又不免再講一次曼聯的角球防守依然好大問題，熱刺如果把握到已經要先輸兩球。中場McFred仍舊係好論盡，時常失控球權，只靠速效取勝。直到六十幾分鐘，在中場逼甩史基比腳下球，再輾轉由C朗交比卡雲尼，輕鬆射2:0。臨完場再由華舒福射成3:0，成功止血兼clean sheet。
今仗表現較好，肯定是前場一對老將，大家知佢兩個無可能場場踢九十分鐘，另外雲比沙卡踢翼衛表現好過打閘，今日表現相當出色，不過處理最後一腳繼續不合格。未來數場呢個陣式可能係基礎陣式，視乎情況換華舒福及格連活入替，而蘇斯克查落鑊邊沿變陣自救，辛祖肯定會成為犧牲品。
雖然今仗勝出三比零，但危機仍未過去，因為熱刺的近況，可能比曼聯更加低迷，未來硬場連場，相信未許樂觀。
精華片段