屈福特 4-1 曼聯
老實，尋晚我睇到二比零時已經熄咗電視，到今朝見到比數先翻睇場波。
呢場比對利物浦同曼城更加恥辱，因為屈福特只係護級球隊，近況亦唔係好，踢落去時仲係好似大人打細路咁。要不是迪基亞今仗有超水準演出，不單止會輸四比一，有機會比人炒半打以上。
唔好話呢隊係咪曼聯，連呢隊係咪職業球隊我都有懷疑，踢到好似U18打職業隊咁。今場蘇斯克查改返踢4231，但今季睇咗咁多場波，問題根本唔係踢乜野陣式，而係球員對戰術細節的執行有問題。
例如今場出馬迪，佢退落後場拎波幫手時，雙中堅唔會散開拉闊，用盡球場闊度，拉鬆對手的前場壓逼，好多時見佢地三個排排企，互相之間只有幾碼距離，加上麥湯文尼唔識拉空位出黎，比人一逼唔係傳返比龍門就只有大腳傳兩邊，但兩翼制空力又唔係好，比人一衝就散，結果上半場有一大段時間比屈福特壓到半場都過唔到。
幾乎每一次寫賽後評要翻寫一次，蘇斯克斯手下的曼聯，係開賽頭段係極不集中經常遊暈，中下游球隊只要係初段拉快速度加強壓迫，好多時會搶到甜頭領先。結果今次因般奴解圍失誤，令麥湯文尼犯下天條，好彩迪基亞連救兩次，先保住唔失球，不過只係捱到二十八分鐘。
下半場無乜好評，惟一亮點只有雲迪碧，呢個半場的表現，攔截的硬朗程度、用球能力、後上進攻，可以完全吊打McFred二人，甚至比近期般奴仲要好。所有曼迷同樣發出一個疑問，點解呢種表現要長居後備？得閑八十分鐘落黎踩下草，蘇斯克查用人的準則究竟係乜？
不過雲迪碧就好似命犯天煞孤星咁，先入一球下諗住今仗可以追和甚至反勝做英雄，點知麥佳亞無啦啦兩黃一紅。而我已經唔記得寫過幾次次，麥佳亞到今日，仍然維持每場最少一個致命犯錯，根本係唔值得踢正選。堅尼話得佢啱，以為係國家隊對住弱旅入一球可以回應批評，係過份天真同自大。
寫緊文時已經傳出蘇斯克查落鑊的消息，希望係真，否則以呢個狀態同士氣，下場聯賽對車路士，肯定又比人大炒一場。
精華片段