李斯特城 4-2 曼聯
又輸一場，反彈無望
睇完呢場波，諗呢幾句可以長期置頂
1. 防守漏洞多
2. 進攻靠個人
3. 死球防守差
4. 要不是迪基亞
今場再試用普巴及馬迪打4231中的雙中場，對中前場的運作明顯有助益，運球及轉邊速度均有改善，但整體而言，有效組織攻勢欠奉，仍然要靠球員靈光一閃，而今次輪到格連活表演，十九分鐘先係右路射入一個世界波，令大家以為有個好開始。
落後一球，李斯特城恢復後，組織攻勢比曼聯更為流暢具威脅。隊長麥佳亞神奇復出，但踢落狀態未足，之前亦寫過，麥佳亞季初幾乎每一場均有一個致命犯錯，之前好彩無直接輸波，今場終於導致失球。麥佳亞接應迪基亞傳球時被搶到腳下球，輾轉由迪拿曼斯射入。
曼聯的中場近排好似跌入輪迴咁，用McFerd的話，創造力及對中前場支援不足，但改用普巴搭任何一個防中呢，改善組織後，防守力又明顯唔夠。需要指出係，曼聯的打法係極為需要雙防中去補位及攔截，因為前線幾個，無論辛祖及格連活都唔算積極回防的球員，不能夠提供好多防守力。
之後賽事的發展無乜好講，基本上同以往的走勢一樣，進攻無法有效形成一波又一波的攻勢，逼到對手犯錯，但後防經常大意失波，嚴重打擊士氣。結果今仗又全失三分，睇到唔係無辦法入波，而係中後場問題太大，入埋唔夠輸。
我諗呢場波之後，球迷對蘇斯克查的去留又會掀起新一輪討論，但過去經驗，球隊管理層的底線肯定係歐聯席位，以現時英超的格局，雙曼利車依然係頭四大熱。但係，以曼聯現時的走勢，未來幾場要搶分仍然唔容易，最大問題係，睇唔到球隊有進步，仲好似越踢越差，同埋睇唔到蘇斯克查有乜變數，可以即時係下場翻身。不過，對比起其他球會，曼聯管理層算係比較包容，可能仲會等到聖誕前後，炒人高峰期先會較明朗，甚至蘇斯克查無論成績，都比佢帶埋今季。
蘇斯克查任務依然艱鉅，因為現時的4231打法，中後場的問題係唔買人情況下仍然無解。曼聯現階段未必要去高追迪勤懷斯呢類防中(DMC)，而係需要補充一個好似今仗對手迪拿曼斯呢類球員(CM)，有足夠的跑動覆蓋中場，但後上助攻及傳送亦有一定的威脅，佢唔駛其中有一樣具頂級質素，但要樣樣有啲幫到中場其他球員。曼聯陣中現時未必要有多粒星，而是多一兩個角色球員做黏合劑。
精華片段