曼聯 0-5 利物浦
呢場波，未完場已經可以寫定文。
球隊管理層認真要考慮蘇斯克查的位置，否則未來幾場聯賽真係非常唔樂觀。呢場波無論用人、打法、球員狀態等等，蘇斯克查幾乎完全做錯。
首先，經過周中亞特蘭大要後上追三球，球員體力消耗過大，今場完全無換人的情況下，一對防守中場的速率下降得相當嚴重，而McFred兩人本來並非位置感及攔截力好的球員，全靠速率跑上跑落。
本來未必會構成嚴重問題，但今場蘇斯克查開賽時想加強前場的壓迫，想籍主場氣勢與利物浦鬥攻，前線三位球員經常壓到對手禁區邊，然而一直以來，曼聯的前場緊逼一直稱不上有效。係前場球員推前，中場覆蓋不足的情況下，中後場曝露空間太多。第一個入球就係格連活無及時逼右路的羅拔斯，要雲比沙卡離開自己的防守位置，衝到前場壓迫，結果，中後場失位，輕鬆比利物浦打穿。
長久以黎容許翼鋒唔回防博打反擊，今仗終於付出嚴重的代價。之後的失球，不逐一分析，基本就係重覆以上幾個題：前場壓迫失效，中場覆蓋不足，後防不斷犯錯，再加埋下半場普巴個紅牌，如果咁唔比人大炒一場的話先至係奇蹟。
蘇斯克查執教後，近三年我諗好多球迷都睇到，曼聯有好幾個問題一直無好大改善過：
1. 開賽頭十五分鐘後防極不集中，經常先失波
2. 前場緊迫有等於無
3. 換人時機差
4. 勝利十一人，部份球員持續犯錯下卻長居正選，後備苦無機會落場
5. 個別球員的比賽態度
好似今場講波佬話齋，趁周中無歐聯比賽，今場後可能係炒蘇斯克查的最好時機。