愛華頓 1-0 曼聯
又輸一場，仲要輸比近況最差的愛華頓，當然曼聯自己近況亦唔算好得去邊。
整場波的發展，就好似一隊完全無練過波的學界落場比賽一樣，差不多任何一個環節都見唔到球員有所配合。華舒福除開賽兩下攻門，整場下來只可以說是維持水準，不斷想扭人，又不斷喪失控球權。近幾場比賽，我相信佢扭波過人的成功率應該係零。辛祖及艾蘭卡的情況差不多係一樣，每次有波到腳，都係打算第一時間快推，希望扭過幾個人然後出腳靚波或者射門。
C朗在9 號位長時間無波到腳，離開位置到邊線，拉走中堅時，翼鋒無意識要走佢身後位，只能在邊線做一兩腳無意義的one two。在左邊的情況特別明顯，經常有三四個球員堆在十碼八碼的地方，無人走位拉空。
至於般奴，不知是教練的要求，還是如傳聞中般奴不喜歡跟戰術踢，作為4231的攻中，今仗他經常退到與防中平排的位置去造波，亦不斷希望以一腳killer pass打通穿對方的防線，但成功率極低。在費特傷出，普巴換入後，中後場的控球完全可以由普巴及馬迪負責，般奴實在無必要長時間待在中後場。
加上他在落後時往往無法控制情緒，會埋怨隊友的走位及傳球，比賽末段就和馬達在場上吵起來，如果繼續維持這種表現，球迷的憤怒恐怕很快就會去到佢身上。
觀乎近幾場的表現，領隊甚至乎管理層，睇怕已經失去對球員的控制，大概已經放棄了今季，全力斟介新領隊，草草捱埋今個球季就算，下季由新領隊砍倒重練。