小組賽 ‧ F組 ‧ 比賽第五輪 ‧ 維拉利爾 0-2 曼聯
正如卡域克自己有講，佢帶隊的風格唔會差蘇斯克查好遠。
陣式及打法上只有微調，初頭看陣容以為會踢433，但實際踢落竟然係41212鑽石型中場，減少無謂的逼搶，四人中場防守時平排展開，以儘快回到半場後塞位佈防，先形成第一道防線。
踢落效果只可以話係不過不失，最低限度無再出現之前踢4231時，兩翼不回防的問題，左邊的費特及右邊的辛祖，經常會到接近底線位協防。不過，雲迪碧最佳的位置，可能係4231中2的其中一個，今場直接踢攻擊中場，反而踢到有啲底迷。Mcfred二人均缺少轉守為攻的能力，面對維拉利爾的前場緊逼，中後場相當手忙腳亂，好彩叫無嚴重犯錯。然後，又係靠迪基亞的神救，上半場先力保不失。
下半場直到換人後，局面才有所改變，改回4231，踢法更加直接，同時加強前場的緊逼，結果維拉利爾成場搓到好順無人逼的情況下，突然適應唔到而犯錯。費特係前場逼甩卡保的控球，撞落C朗腳下一挑入網，係今季少數前場逼搶成功而直接轉化為成入球。
曼聯入波後士氣大振，形勢逆轉，維拉利爾再無組織到有效攻勢，係臨完場前再由辛祖射個靚波中楣底再彈入。
贏波兼出線歐聯，暫時止止血先。
精華片段