曼聯 3-2 熱刺
連續兩仗失利，上仗對曼城末段更加踢到士氣全無，又傳出C朗擅自回到葡萄牙養傷，今仗更有麥湯文尼及般奴未能出賽，賽前令人相當擔心球隊表現。
排陣上用馬迪及普巴代替麥湯文尼及般奴的位置，但踢法上明顯有改變。C朗經常回後幫波，差不多與中場平排，後上及突破越位的任務，多由辛祖及華舒福負責。有馬迪鎮守中後場，費特的位置亦推得更前參與助攻。
結果這輕微的改動收到奇效，第一個入球，就係費特後㬹彈比C朗然後走位插入，令迪亞猶疑了一兩秒無撲出去封，C朗廿幾碼射個世界波入網。
之後泰利斯禁區內犯手球，再一次顯示出英超球證執法水準的問題，差不多情況下，迪亞的手球連VAR都無，而泰利斯的手球即吹十二碼。
稍後時間，辛祖突破越位，交橫C朗輕鬆射成2:1。之後，為保持勝果，曼聯縮後防守反擊，主動權落在熱刺腳下。雖然如此，曼聯今仗防守上講不上十分出色，只是熱刺的進攻線更加低迷，主力孫興民好似著錯boot咁多次跣低。可惜守到七十一分鐘終於失守，麥佳亞門前出腳攔截擺烏龍。
被追和後，蘭歷克冒險收起防中馬迪，出卡雲尼改踢442放手一博。最後在八十分鐘憑C朗接應角球，一頂破網，再度領先。蘭歷克亦即時收起C朗，換入連迪洛夫，改踢541守到完場。
雖然已屆37歲，C朗仍然係頂級球員，只是休息一場，狀態即可恢復十足，餘下十場聯賽加歐聯比賽，幾個老將的留放相信係關鍵。