小組賽 ‧ F組 ‧ 比賽第四輪 ‧ 亞特蘭大 2-2 曼聯
今仗陣式雖然一樣排出532，但人腳有輕微的輪換，普巴今場正選，卡雲尼上場踢到抽筋，換上華舒福，以及出拜利。踢落陣式一樣，有少許微調，左右中堅的位置放得更前，甚至偶然偎上前場幫手組織，可以overload亞特蘭大中場。
不過，開局早段已經見到差別，華舒福缺乏卡雲尼的積極跑動，前場的緊逼效果差得遠，當然亞特蘭大無論組織能力及近況亦比熱刺好得多。中場起用麥湯文尼，但欠缺控球及轉守為攻的能力，令到普巴必須墮後協助，踢落中場見到有少許失衡。
失第一球又是老問題，頭十五分鐘集中力不夠，在明明夠人的情況下，走甩對手。失球前，所有球員被右邊的杜雲薩柏達吸引，梳爾好像忘記了自己踢緊532，慣性移入中路補位而走甩後上的伊歷錫，再加上迪基亞撲救時犯錯。
隨住華拉尼傷出，在落後的情況下，蘇斯克查果斷換出格連活變陣成4231，在臨完半場前，憑格連活直線傳比般奴，然後後㬹彈後比C朗，輕鬆射入追和。
半場英文傍述講出曼聯的問題，後場四個後衛加上麥湯文尼五個球員，均沒有能力從後場build up，曼聯的問題不在前線，而在後防，無論前面有幾多天才橫溢的球員，運唔到波去前場，依然構成唔到威脅。
下半場一出場，雙方將節奏拉快，由於前線換入格連活，前場緊逼已毋須寄望，中前場稍為收後，加強中場的攔截，形成中場混戰居多。在亞特蘭大換人加強中場壓力後，曼聯雖然換多一個進攻球員，但進攻反而比上半場弱。結果不到六十分鐘，杜雲薩柏達突破越位射成2:1，又係隊長麥佳亞包越位。
之後的局勢就好似對英超中下游一樣，空有控球，但組織不到有效攻勢，偶然還會因為空群進攻比人打反擊，好彩亞特蘭大下半場體力下降比較快，組織唔到快速反擊，否則會比人拉開紀錄。
然後，又係蘇斯克查的老問題，今仗幾乎已經再無失分空間的情況下，一直拖到八十分鐘才換人，但由於比賽的情況，去到86分鐘先有死球。淨低唔到十分鐘的情況下，換入辛祖及雲迪比，試問又有幾多時間讓球員換轉戰局？結果又係靠C朗救返場波。
最後，我再要指出麥佳亞的狀態問題，去到十一月已經唔能夠話係季初，佢仍然持續每一場有一個致命犯錯。今場睇落，拜利的狀態係完全無問題，甚至係無持續有正式比賽情況下，打得比麥佳亞仲要好，當初為乜要勉強麥佳亞復出呢，當放個假比佢調整下好過啦。
精華片段