今夏轉會窗曲終人散，無論因為沙特資金造成嘅天價交易、定係意料之外嘅競爭同選擇，用咩角度睇呢個都係一個歷史性嘅痴_線轉會窗。對曼聯嚟講，個人認為都係近年比較特別嘅一個夏天。大家又點睇呢？
我唔係講佢成功——成唔成功要過多一排，睇球員場上表現先下到定論。反其道而行，小弟先講嘅唔係買咗咩人，而係曼聯大概係7年嚟第一次可以成功放售4個或以上一隊球員（兼收到轉會費）。
必須再講一次︰能夠賣到人，非。常。重。要。唔係單純「有出先有入」、「驚啲人出唔哂」、「唔養廢人」嘅打機概念，甚至唔只係釋放薪酬空間嘅問題。喺FFP時代，賣人嘅錢扣除剩餘價值可撥入即年收入，而曼聯因為有個仆街班主Glazers，我哋喺英超FFP底下嘅制肘比其他球隊緊張好多倍。
喺度講多兩句，2015/16球季起，英超落實「盈利及可持續性」規則，大約可以理解為FFP有額外虧損限額容許班主以借錢或回購股份等形式科水，差額係£90M左右，而Glazers唔單止唔科水仲要年年用利息陰乾曼聯，所以大部份英超球隊嘅FFP三年虧損上限係£105M，曼聯係£15M。所以我哋仲買到人根本已經係奇蹟，而邊個再同我講話「Glazers肯比錢買人都唔係太差啫」，you know nothing about football finance you dumb shit。
回歸正題，曼聯買人都仲可以話係用自己營運盈利去做，賣唔到人就會直接被FFP重擊，今年大家見到車路士使錢使得咁開心，除咗佢哋利用漏洞簽超長合約做攤銷，最最最緊要係佢哋賣人流動性極強。今夏車路士賣咗8個一隊球員，回收咗€264M，曼聯對上五年加埋都無呢粒數；另外曼城連續三季都賣到人，平均每季都超過€100M。當然，賣人嘅價錢未必反映一切，呢個同球員、球隊表現、同其他球隊戰術是否已接軌都有關，但討論重點係如何清理球隊冗員，阿仙奴、利物浦轉會收入未必好多，最少你唔會覺得佢哋養一堆deadwood先。
咁到底曼聯賣人算唔算成功呢？Elanga €17.50M、Dean Henderson €17.50M、Fred €9.74M、Telles €4.60M，呢堆都係本身質素不足需要upgrade或一心求去嘅球員，如果學熱刺Levy喺人哋上機前反價，可能都咬到多少少錢返嚟嘅，不過坦白講，價錢個人認為勉強可以，唔針對討論了。以上呢堆球員都喺唔同嘅比賽曾經有過出色演出，值得講句Thank you，不過而家離隊真係稱唔上可惜；另外仲有Kovar、Zidane Iqbal、Mengi呢堆勉強有能力同一隊訓練嘅青訓。講開青訓，其實能夠直上一隊兼擔正嘅青訓球員從來都少之又少，有後備坐下都已經叫罕有，更多大家見唔到嘅係默默無名之下解約離隊。大家有青訓情意結無問題，但唔好太多幻想，現實係賣得出去，有錢收，已經賺突。
此外，Greenwood成功喺deadline day借走——不論佢是非，假如唔比佢出場又要夾硬留隊又係搞唔掂，最後幾個鐘聽到話拉素交易告吹心諗凍過水，最後有基達菲出嚟救亡，麻煩哂了。最後兩位年輕左閘——實力見底嘅Brandon Williams同實力未足嘅Alvaro Fernandez都早早搵到機會外借。又咁講，曼聯借人走一向處理都唔算太差嘅。
賣得出固然好，可惜嘅係仍然有一堆deadwood清唔走︰Maguire因為前朝班白痴開人工開太高搞到走唔成；Bailly、Van de Beek乏人問津；McTominay個人反而認為唔急賣，曼聯現時嘅中場缺乏身體對抗性，唔啱價真係唔使夾硬清走佢。
結論係Sales Department都仲係麻麻地，但起碼有進步先。前三年加埋都收得返錢嘅一隊球員，得A.Pereira、Smalling同Dan James咋陰功。
篇文已經好長，分開買人篇去下集寫…
