今場真係睇得好開心，咩都齊曬：上半場受壓有神救，下半場轉陣扭轉形勢，Rashford第二個入球個走位教材級，第三球有美妙team goal，最後廿分鐘仲有幼幼睇，唯一遺憾係全場做非常多off the ball work、下半場由攻中轉返打正前嘅Weghorst仲未入到波。
三個入波、不失球、拎足三分，大滿足。
開賽初段Ten Hag以Rashford打正前、Garnacho打左、Weghorst攻中迎戰，喺缺少Casemiro嘅情況下，呢個組合相對會帶比球隊更多穩定性，然而今次算盤打唔響，Sabitzer、Fred嘅組合都唔算holding midfielder，李城喺曼聯後腹搵到好多空位，曼聯前場亦因缺少具威脅嘅走動而顯得攻不銳守不穩。
下半場以Sancho入替Garnacho，Sancho出任攻中，Bruno繼續居右，Rashford則打左邊，效果明顯。Rashford貼住對方後防線跑身後位入心臟地帶本來就係強項，呢樣係相對習慣挨住邊線走嘅Garnacho做唔到嘅事，Rashford第二個入球繞過Castagne嘅走位正正係Garnacho想挑戰青訓大師兄地位要學嘅課題。
特別想講一講Sancho，復出嗰一場入嚟起已見到佢主要打攻中，似乎係Ten Hag審視佢過後為佢度身訂造嘅新定位。事實上佢嚟英超以嚟打兩翼位置都用唔到佢嘅能力，有可能係佢嘅速度同走位習慣不搭配曼聯現今嘅翼鋒要求。既然技巧不俗，傳射皆可，加上靈活性佳，「轉型」打佢未試過喺曼聯出任嘅攻中位並無不可——特別係本身Bruno並未有替補之時，Sancho今場表現似乎為Ten Hag嘅嘗試增強不少信心。