曼聯頭60分鐘一直延續上場問題，後場build up受制於列斯聯三前鋒嘅迫搶，中路完全無法出波；今場為咗備戰周中歐協盃對巴塞隆拿，Ten Hag更拆散一對正選中堅組合，改由Maguire夥拍Shaw，Malacia出任左閘。左中堅唔用Lindelof原因係想Shaw成為曼聯3-2陣嘅左腳出球點（Malacia移中作double pivot），思路清晰，但成效不佳，甚至偶然因為build up被折斷差啲輸反擊（Maguire只係其中一環，老實講中場幾個現位不足都有責任）。情形去到Martinez入替Malacia、Shaw復任左閘，曼聯終於有一個中路出球點，可以將皮球傳比Bruno、Weghorst或兩翼球員，先有好轉。個人相信呢樣係Ten Hag 嘅賽前部署之一，除咗保留體力，特別係見到列斯聯上場後段體力下降，減少前場迫搶改為控球，呢個時候曼聯先開始打長波（第一個入球來至Sabitzer後場得益於列斯聯減少迫搶而獲得空間作出嘅長傳），甚至以Wan-Bissaka入替Dalot，反客為主增加中前場迫搶能力（第二個入球就係Fred嘅中場迫搶成功反擊得手），可能算係幾有心思嘅戰術舖排。當然呢個都有少少賭博成份，畢竟頭60分鐘列斯不乏先入一球嘅機會...
特別讚Weghorst今場對曼聯前場串連工作有極大貢獻，特別係Bruno長期被逼往邊路後，Weghorst不論攻守幾乎打哂成條中軸線，最後一擊嘅入波被吹走有少少唔抵，慢鏡睇得唔清楚，個波有機會係省到列斯聯球員隻手反彈比Weghorst，未必構成越位。突登唔揀入波嘅Garnacho同Rashford，今次張圖揀咗你！
曼聯贏波後暫升上第二位，領先踢少兩場嘅曼城1分！