與其話曼聯嘅針對性部署有效，反而係愛華頓整個上半場都無因應自己嘅漏洞作調整更加恐怖。曼聯上半場以後場長傳製造嘅單刀攻門最少有四次，要不是愛華頓門將Pickford今場嘅一對一防守卓越，面對半場已有21次射門嘅曼聯分分鐘半場已經落後四、五球。咁落去，到底愛華頓係咪真係有能力留喺英超…？
講返主隊，今場值得點名評價嘅球員有兩人，一係出任「防中」位置嘅Bruno——特別喺下半季Casemiro、Eriksen缺陣，而且McTominay、Sabitzer、Fred任二組合嘅表現皆不理想嘅情況下，Bruno並唔係第一次出任防中位置，坦白講一直以嚟嘅表現都係幾差。Bruno防守位置感、攔截力絕對唔係兩位世界級中場嗰皮，加上佢習慣性具創造力（同時具風險）嘅傳球選擇，如放於後半場絕對係曼聯一大隱憂（雖則場場都爆一次以上，嚴格嚟講已經唔算「隱」），但今場表現又幾好喎。當然好大原因係愛華頓今場進攻根本無乜喺中場施加壓力，其次係佢都真係踢得成熟咗，唔執著於通透、穿透力嘅波，而係簡單嘅左右分配幫球隊「出波」，其實已經好稱職。此外，今場Bruno踢防中最impressive嘅係因為曼聯有唔少長傳急攻嘅鏡頭，Bruno放喺後場就更加有價值。