前兩日Mount here-we-go，好幾個人問我有咩睇法，我沉甸幾日後得出嘅結論係︰人可能無買錯，但買人嘅人錯到亂七八糟。
第一句嘅意思係Mount喺各方面能力、國籍、年齡等因素下，唔難理解點解Ten Hag想要佢。「全能球員」同「四不像」往往只係一線之差，最後結果係向邊個方向走，好視乎領隊功力。假如撇除價錢牌去睇，Martinez中堅固然係最佳收購；Antony對曼聯右路同中前場嘅推進有莫大貢獻；就連借將Weghorst同Sabitzer都有貨交，唯一疑惑係年輕球員Malacia似乎未達水平，Ten Hag開口話要買嘅人，大部份最後都可以提升陣容同戰術多元性同表現。現階段下，即使Mount有狀態、心態問題要解決，大家似乎應該要對Ten Hag、Mount都有多少少信心。
至於第二句話買嘅人唔啱，係講緊主理買人談判嗰位人兄，成個談判策略完全難以理解。
一開始傳出嚟話「曼聯想用£40m買Mount」我已經覺得好驚訝。一個講咗成個月話想加盟曼聯嘅球員，剩返一年合約，講明唔會續約，今夏賣唔出就要白白比多一年糧+約滿免費走人，加上車路士五月底時擺明有FFP同埋要賣人嘅壓力，點聽曼聯都喺談判度佔上風，£40m完全係overpriced，仲要拎嚟做opening bid，小弟當然無專業估價能力，個人推算£30m左右會係一個相對合理價位。
然而車路士還嘅第一口價係£70m，已經心諗不妙。車路士擺明晾高個價預你negotiate down。喂，你行年宵都識開價同心目中個成交價要有水位丫？最慘係曼聯真係過兩日就交個improved bid上去，驚死人哋真係死都唔賣咁，喺佔上風嘅談判都被人牽住個鼻走，班友係咪喺抬價部啱啱轉team過嚟？成個交易階段唯一做過嘅好事，係威脅車路士「嗱，如果你唔答應呢個deal就算喇，我拎住舊錢去搶你個top target Caicedo」，到時車路士就陷入白出人工、無轉會費收、轉會目標被抬價嘅「三失」局面。
以為形勢好轉之際，最後曼聯又提升咗offer，成交，盛惠£60m，比第一次提交嘅bid貴咗50%。
由此可以証明，曼聯係一間充滿良心嘅球會，非常肯定佢哋係社企嚟，因為曼聯成個招聘、人事管理部門智力同溝通技巧，香港好多所謂NGO都請唔落手。個人建議硬性規定佢哋每星期去香港啲街市買一次餸，了解基本交易談判點運作。
（喺度同有障礙人士先講聲唔好意思，用曼聯班職員同你哋比較係侮辱咗你哋，本文並無歧視之意…）
仲未計De Gea嗰單嘢，我唔理中間有咩內情，一間自詡大球會竟然搞一個效力咗十年嘅門將嘅續約可以處理得咁核突，搞行政嗰班全部可以去切腹。就算Ten Hag戰術對De Gea有質疑，佢一直都理解門將位置唔係球會招攬球員嘅首要任務，至少唔係今季先。而家搞成咁，曼聯要花多一筆錢買個新門將，本身話係priority嘅中鋒位又變咗無錢買。你話招聘部門係咪業餘級別？
題外話，現今球會運作，領隊喺談判、續約、邊個球員值幾錢嘅呢啲事情上，唔會有最終話語權，最多只係有提議，但比幾錢、續約點處理呢啲問題，領隊唔會係執行嘅人，所以打FIFA、FM打上腦以為以上所有嘢都關領隊事嘅朋友們，要搞清楚球會點運作先出嚟咬Ten Hag…
