有少少hard to swallow嘅敗仗，曼聯今場嘅防守大致上無咩犯錯，上半場憑一次自製防反（自己build up失咗然後反搶成功）領先，唔夠一分鐘後失波完全係因為防線唔專注。之後阿仙奴嘅威脅大致上擋得住，甚至只係差少少就beat offside trap再度超前，補時階段先被反勝，不得不提曼聯當時已被迫出動第四、第五中堅Maguire及Evans。天時地利人和全失，唔係輸波搵藉口，但曼聯單用表現計，又未至於無得打嘅。
咁事實上曼聯踢成點呢？坦白講，上半場曼聯嘅後場build up係好謎。大部份時間後場以3+1+0.5嘅形態嘗試組織個波上中前場，而呢幾個人嘅人選完全係流動嘅。意思係Wan Bissaka、Martinez、Lindelof、Eriksen、Casemiro，不時加埋Onana，求其三個人舉手都可以形成back 3，然後一個人做中場接應點，一個人走half space或拉位，另外嗰個（好多時係Dalot）就直接衝上前場（真係中鋒個位）準備接長波。
呢個終極流動性，最離譜我係見過Casemiro + Eriksen + Wan Bissaka做back 3，Linelof做中場接應點，Martinez拉half space（定唔知去咗邊），Dalot走咗上前鋒位。好處係對手好難做有效壓迫，唔好處係己隊啲人錯哂位，組織嗰個、走位嗰個都唔識做自己嘅工作，變相一味自己換位唔知做乜，但個波就永遠打唔到上去比前面嗰五個人…
問題係點解要咁做？我唔知，我戰術思維跟唔上，更甚，似乎曼聯班球員都跟唔上。因為下半場出嚟已經簡化返成個build up工序。成個上半場曼聯嘅後場組織成功率貼近零，無啦啦一次自製transition入咗波，嗰下其實個反應唔係慶祝，係「到底做緊乜鬼嘢…？」
結果論+大方向咁睇，上半場曼聯成功減少咗阿仙奴控球時間，避免被圍攻；下半場趁阿仙奴想贏波再靠Bruno、Eriksen長傳打transition，如果咁睇返全場波，曼聯距離作客拎一分、甚至三分，並唔係真係差咁遠。
之後一定要講講Hojlund。
處子登場，最緊要就係確立風格同作用，入波、助攻呢啲bonus嚟，但大約30分鐘左右，最大感覺係終於有人喺前點做到嘢。Martial今場喺前面好努力，又拉位又回防又跑動，不過真係一啲end product都無。佢對位Gabriel，唔好話要求Martial停到個波、或者轉身，根本連身位都未食到就被推走了。Hojlund一出場擺明車馬同你鬥攬，食住個位令阿仙奴無辦法及早瓦解個反擊，之後曼聯先有故講︰拎到波嘅話就回，拎唔到就執second ball。最明顯作用當然係Garnacho嗰下詐糊，拉空位，踩後比後上隊友打落去佢拉出嚟個空位度。完全示範比Martial佢個位應該點踢。
唔係想J佢，純粹想講，個陣容終於成形喇… 如果唔計傷兵的話就係，喂但係進步嚟架喇，上兩年無傷兵都唔敢咁講呀喂。
