今朝起身先睇返尋晚場波，曼聯贏在質素但球隊嘅大部份問題都未解決到。
最明顯係後場build up，出球能力都係疲弱。今場就算面對般尼，從後場依然無辦法用長傳以外嘅方法progress皮球上final third甚至中場。當然必須acknowledge嘅係曼聯今場防線四人Reguilon、Evans、Lindelof、Dalot都唔係球隊本來嘅正選人選。
後場出唔到波其中一個因素係中場連接點不足，以往有Eriksen同Antony都叫做有人回轍拎波。而家無咗Antony，Bruno「客串」右翼基本上對build up零作用，一日到黑好似前鋒咁等走身後位（今場又比佢咁樣搵到個入波返嚟），得Hannibal同McTominay兩個喺中間梗係難拎波。
今場起用Hannibal幾有趣。佢係一個中前場出身嘅球員，技術球商俱佳，喺近年嘅位置一度被後移去做中後場指揮官嘅位置，目的有兩個︰訓練佢球賽閱讀能力，同埋幫佢「收火」——青年軍時期呢條友出名火爆（同人開拖嗰種）同球場紀律問題，希望後移可以令佢性格沉穩返啲，協助佢升上一隊。
當然我唔會話Hannibal係全能型中場，佢嘅天賦依然喺進攻上面，而今日佢喺攻中位置做前場連接點，反而好似上季嘅Weghorst嘅部份功效。Hannibal嘅出現令Hojlund唔使回後幫波專心喺前場開山劈石，整體前場運作比起早場係流暢咗。Hojlund需要時間去了解隊友、同埋Rashford開始進入「入唔到波就鑽牛角尖」然後做錯哂決定嘅循環，再加埋前場因為後場build up太廢而無乜波到，大部份攻勢「只能」靠transition得來，就去到另一個層次、兼且喺現階段傷兵滿營嘅情況下頗難解決嘅問題了。
