早排 BLnaze的足球札記 先講起，咁多隊夏天轉會策略，曼聯應該算係數一數二難諗。原因係整體運作又唔算好差，但好好又唔算係，又唔係話有邊個位算明顯弱點，但後備兵力表現又有啲差距，呢啲真係最難搞。
今場波其實大致都係呢個問題，Ten Hag嘅曼聯好講求球員位置流動性，大量走位同位置轉換——但現實唔係咁易。即使未至於去到「全能足球」咁款，對球員各方面嘅技術要求都唔會低。曼聯嘅情況大概係，球員唔算有明顯弱點，但個個都唔夠全能，一換位就做唔到任務，唔換位就連任務都無得做。
缺少Rashford呢個finisher，Ten Hag可能想將呢個任務分散出去，Martial自然係最有能力嘅人，但因為戰術系統要求箭頭大量策應工作，於是佢傳下、跑下，最後連射門前嘅走位都唔夠力做… 仲未計Bruno踢到街場咁，有位就走，結果finisher任務最常見就落到Antony身上。
個人覺得大家唔可以單純因為佢「失機連連」去怪責佢，之前講過佢應該係推進者(progressor)，今場波佢中場推進貢獻極大，但當佢又要兼顧final third嘅任務（無論Ten Hag有無呢個原意都一樣，反正Antony就係想入波），而今場大約有四、五球去到佢腳下嘅big chance、half chance，往往就會喺不明所以嘅情況下做出奇怪決定、傳唔準、射唔中，繼而無辦法入波。
搞笑嘅係Garnacho後備入替Sancho，話比你知好簡單︰人哋打高位，你跑得快就自然有機會… 於是一射一中一入球，Antony搞咗成場幾廿次掂波，好彩都叫做有個助攻，但final third嚟講，Rashford同Garnacho在陣真係好好多丫嘛…
場波除咗Garnacho、Varane復出，表現計查實又無咩值得好高興，又唔係踢得好，不過又係嗰句，三分已袋，剩下三場聯賽拋離第五位嘅利物浦4分，輸波嘅熱刺正式無緣前四，戰果嚟講nothing much to complain。
