Antony貢獻首個助攻 曼聯重回聯賽第三位

Dalot打左閘效果不錯並不意外，喺葡萄牙國家隊佢打呢類嘅位置收獲入球亦非新鮮事，之前都有分析過Dalot好喜歡喺中路underlap/cut in入禁區，今季都好多呢啲畫面，今次終於把握到機會入波，坦白講，早就應該入到波啦。反而係希望Ten Hag見到Dalot原來左閘都ok，中短期唔好再用Malacia喇…

我留意咗Antony一排，其實佢一直以嚟對曼聯推進皮球嘅貢獻係好重要，所以曼聯無佢嘅比賽往往會踢得好辛苦，問題係一入到最後final third就會變得好迷惘。直至近幾場波開始見到啲final third decision好返啲，係嘅——即使仲係好多右路half space curl遠柱嘅波（唔入），但正正係因為佢做得夠多呢個動作，開始吸引到對方防線繼而喺另一啲地方失位。把唔把握到呢啲空間係Antony本人嘅決定、同埋曼聯隊友走位有無配合到嘅結果，假如隊友都一心「睇你表演」就放棄走位，咁Antony嘅final third就永遠只能係浪射了。

Maguire同Lindelof嘅組合喺開賽早段依然叫人膽戰心驚，Maguire上半場角球嘅手球，個人認為係漏判十二碼，最後走得甩係有啲運氣，但隨後、特別係Lindelof，表現係唔錯。De Gea反而係今場曼聯眾球員中表現令我最失望嘅一個，面對對面擺明針對性嘅貼門角球，去到應對第四、五個傳中波都仲未見到有任何改善。我喜歡De Gea呢個球員，亦希望佢留隊，但我越嚟越相信自己季初嘅評價︰曼聯可能比想像中更早需要考慮門將位置嘅繼任人選。