用最簡單嘅方式總結比賽︰上半場係一盤散沙 vs 一支正常球隊；下半場係一支正常球隊 vs 一堆殘弱疲兵。
熱刺上半場嘅表現差到唔使評，成堆中後場儼如雪糕筒，曼聯前場四個球員拎波都可以企定定零pressure，中場線同消失咗無分別。最抵死係曼聯第二個入球，Dier由起始位置、防守間距、身體面向、遮線選項全部都係錯…
下半場熱刺起碼有返基本隊形，但形勢開始傾向主隊係由曼聯換走Eriksen同Sancho開始。Fred同Martial兩個出嚟表現可以用差嚟形容，但曼聯失勢嘅原因更大係單純「Eriksen不在場上」。Eriksen對曼聯最大嘅貢獻係調度比賽節奏，幾時要快傳、幾時要慢傳，低風險控球在腳定嘗試一啲風險高啲嘅直接傳球，眾所周知（正常嘅）熱刺最叻就係打transition，Eriksen不在場就注定曼聯失去控制比賽節奏嘅能力（因為包括Fred嘅其他中場全部都做唔到，甚至Bruno都唔係嗰回事，同埋佢都係啱啱傷癒），熱刺可以打反擊嘅次數大增；Fred同Martial兩個都唔少失誤亦加劇局勢扭轉。
實好多球迷會質疑點解仲要換走Eriksen？傷癒復出無耐，本身狀態已經不足，最直接就係體能問題；同樣地，剛過去嘅足總盃四強對白禮頓場波踢足120分鐘，直接消耗埋陣中唔少球員嘅體能儲備——即使唔係個個踢足，要知道場波嘅戰術運用極耗體力。同樣嘅事發生喺尋晚白禮頓作客森林嘅比賽（大家睇住榜首大戰其實我雙開睇哂全場），白禮頓上半場都仲勉強好地地，下半場體力斷崖式崩盤，集中力、準繩度同活力都出現頗大落差。仲要唔好忘記，後場四條友除咗Wan Bissaka叫做正選，其餘三個都係後備或者唔係打緊自己擅長位置。
選擇Fred入替可能係無可避免嘅「錯誤」（Sabitzer同樣傷癒狀態成疑），後來Weghorst上陣塞返住中路，算係亡羊補牢嘅stop gap手段最終見效。可以理解曼迷嘅frustration，同時我都好諒解Ten Hag選擇實在唔多。而下半場局勢發展急劇轉差嘅情況下，坦白講最後無被人反cup我都偷笑…
結果而言，最後拎唔足三分理應對曼聯爭四嘅局勢影響不算太大，反而熱刺就保留住爭歐洲賽嘅主導權，歐霸定歐協聯就要睇埋利物浦、維拉同白禮頓嘅表現了。