好難得有場波咁多嘢可以讚，實在感動。
今仗曼聯上半場嘅壓迫應該係本球季最佳表現之一。個契機（pressing trigger）搵得啱，迫搶時間一致，中後場亦有相應follow through。每次阿士東維拉後場組織運球去到邊路位置（所謂嘅Zone 1 & Zone 3），曼聯就會動用箭頭Rashford加任兩翼之一嘅Sancho或Bruno封鎖傳球路線並對持球者施壓，後面嘅兩閘、邊中場（特別搶眼嘅係係Sabitzer）就會針對維拉三線過闊繼而cover長傳選擇，淨計上半場因迫搶重奪球權之數不下五、六次。
另外值得慶賀嘅係曼聯繼「馬卡靴」（Mata、Carrick、Herrera）組合之後，終於搵到適合打4-3-3嘅三人組合。今季曼聯通常會喺Casemiro+Eriksen雙防中之間再增加一個進攻中場（Bruno為主）形成4-2-3-1，今場嘅4-3-3喺呢兩人以外增添Sabitzer——但佢加貼近一個box-to-box嘅打法（傳說中Pogba理應打到嘅位置）去紓暖Eriksen嘅防守工作，亦有一定前插能力助攻。而Sabitzer今場不負所託，好幾球喺後場幫手堵塞咗兩閘同中堅之間嘅空位，進攻上亦有建樹。
再講講game management，Ten Hag明顯係有汲取到前幾場Eriksen因狀態體能未十足而被換走後中場失勢嘅教訓。雖然馬後炮，但我同我賽前見到正選名單後嘅想法相似——Antony先任後備，係為咗換走Eriksen時保留中場透過兩側progression嘅能力，同埋節奏控制嘅能力。事實係嘛，你望下曼聯中前場︰Bruno、Fred、Sabitzer，以至Rashford同Sancho，有邊個拎波唔係即刻向前比或向前跑而會拖慢少少個波？講笑咁講，Antony用嚟自轉嘅時間，喺Eriksen缺陣下突然變得好重要；又，Eriksen缺陣嗰排，曼聯嘅中場progression幾乎係無咗Antony不可的。
最後講埋中堅，Lindelof同Shaw嘅組合打得越嚟越好，今場特別係面對擅於走L字位同有一定速度嘅Watkins，Shaw嘅速度同閘位防守意識今場都算完勝咗對手。好多人「關心」Maguire傷癒復出會唔會失去中堅位置正選，個人認為，真正嘅決定性因素係Dalot/Malacia打左閘嘅效果有無比Shaw打中堅來得差，主導權可能唔喺Maguire本人度了…