唔係睇錯比數、唔係輸到懵咗、亦唔係「明明我應該贏架！」嘅賭仔式咆哮，的確前中後三線仍然有好多不足，我由上半場一半已經咁覺得︰呢場波係我近期睇曼聯覺得最有希望嘅一場波。呢篇文我當然會講點解我覺得曼聯踢得好（咗），後半段會怒＿球隊嘅，所以純粹有一口烏氣想吐嘅，可以直接飛去文章後半段齊齊放負。
首先澄清，般尼茅夫今場係better team，值得贏，我講嘅係，曼聯唔少意想不到嘅改善。之前一直話曼聯嘅後場build up同progression都有非常嚴重嘅問題，就算由上季開始計，特別係當Martinez、Eriksen、Casemiro任何一個人缺陣嘅時候，曼聯基本上後場只係識得橫傳同後傳，無progressive pass，前後場唔難見到完全割裂嘅現象。
今季呢三位球員都先後因傷停缺陣，中後場表現爛到我連寫文都無心機。今場呢，Amrabat成為咗中場支點；Eriksen嘅位置變成咗大家笑「前鋒腳」嘅McTominay。今場兩個嘅表現值得嘉許︰前者喺後場作為防中嘅串連、轉向、現位係近期見過最佳，曼聯總算喺中後場可以做到一定程度嘅流轉；McTominay作為中場嘅進步都係明顯——無錯佢嘅後上、入禁區以至能力近日都受到追捧，但其實佢喺中場位置嘅現位同支援都好咗（好咗咋、未係好好呀）。
聯賽嚟計，上場對車路士時，曼聯中場被稱為表現燦爛，實際上更大原因單純係車路士中場因傷停失效。坦白講無睇對紐卡素嗰場，再對上嗰場係有Garnacho世界波、大勝愛華頓3-0嘅比賽。當時嘅中後場都係一pat屎咁，之前更差。今場對手般尼茅夫，小弟都有一排無睇，驚訝佢哋一對中場Christie同Lewis Cook出場令嘅機動性、迫搶時機同準繩度原來提高咗唔少，至少比起上場嘅車路士中場來得難纏。喺咁嘅前提下，今日嘅曼聯竟然仲有好耐無見過嘅中後場運轉，更顯得出曼聯中場嘅進步。
另外，第二場收起Rashford，左路Garnacho活力有明顯提升，直接使中路嘅控球威脅倍增，左右平衡嘅攻力令右路Antony空位都多咗，甚至連Martial都唔知點解今日跑動特別多，佢嘅回轍、加上前線球員轉邊、球員流轉嘅速度，全部都有明顯嘅進步（註︰佢條bar非常低）。今日見到嘅曼聯唔再係空有控球喺外圍圍搓，而係有一定板斧穿透對手防線。
讚到天上有地下無咁，咁點解仲要輸？
好簡單，因為一個考30分嘅學生，進步一倍都只係60分僅僅合格，對手係70分嘅護級份子你都搞唔掂囉。
第一個要講嘅問題當然係進攻。喺前場總係有種「差少少」嘅感覺，受限於個別球員嘅個別能力。Garnacho有活力，但傳球準繩度同戰術理解欠奉，總係同隊友嘅配合差之毫釐；Reguilon幾下傳中質素同視野都浪費咗幾個xA；啱啱讚Martial跑動多咗，但體格總係爭少少先食得住對位嘅Zabarnyi，就算勉強彈到個波比隊友都未必係最佳位置同時機。Hojlund出到嚟其實真係完美示範比你睇咩係一個稱職中鋒… 一出嚟第一下就搏到Zabarnyi作為last defender拉衫拉跌佢，之後點解對手無黃牌但Hojlund自己拎牌就真係要問球証先知了。
傳差少少、控差少少、射差少少、走位差少少，加埋就唔止差少少，比較失望嘅係整體嘅契合度不足。球員對節奏嘅理解不一——傳嗰個比前，接應嗰個收步，呢個畫面，你任講兩、三個嘅combination都最少有一個咁嘅畫面。呢樣嘢同有幾時間練波夾波都有關。所以要「重建」曼聯，歐洲賽、本土盃賽早早出局多啲時間練波，未必係壞事。
第二樣做得唔夠好嘅，要講返個後場。個人其實非常唔鍾意復出嘅Shaw客串中堅。我明白Ten Hag嘅邏輯，希望有個左腳仔踢中堅去確保build up。但問題係左閘嘅Reguilon本身已經麻麻，Shaw打中堅嘅位置同體格又麻麻，搵佢客串中堅等如兩個位置都放棄咗最佳選擇。好多球波Reguilon浪費機會，我都喺度諗「如果係Shaw就好喇」；頭兩球Shaw失位失波，我又諗「如果係個正統中堅就好喇」。有時面面俱圓同兩頭唔到岸只係一線之差…
最氣頂係，咁build up有無真係好咗？承上文，我覺得有，但又未夠好。Shaw同Amrabat搵隊友嘅能力唔錯，略嫌不足嘅係McTominay現位需要再好少少去做支援，又係差少少之下，面對今場好出色嘅Christie同Cook，都係直接輸咗兩個turnover led to goal。你可以話般尼茅夫嘅埋門力今場係exceptionally good，但呢個典型嘅「手術成功、病人死亡（兩次）」案例，笑唔笑死。
最後係咁意提及下個死球防守真係差得過份，唔明點解zonal mark可以有個zone係無人。
打下打下篇文比預期中長好多，多謝你輸咗三球都睇呢篇長文，無咩事我都係去抖下算…
