Sabitzer同Martinez（同Eriksen）同時缺陣嘅情況之下，作客魯營球場可以打和絕對收貨。延續上兩場波對住列斯聯中路無法推進嘅問題，Ten Hag嘅短暫解決方案似乎係想Weghorst同Fred喺中場做串連，然後允許Sancho、Bruno、Rashford三子更多時間就逗留喺危險嘅位置。然而問題係兩位都唔係擅長呢類型工作嘅中場球員，更多嘅情況下係見到曼聯後場五人同前場五人完全斷開。第二個失球正正係咁輸，而上半場早已有唔止一次類似鏡頭。
一排無睇巴塞，不經不覺佢哋比想像中弱咗好多。整體戰術猶在，但場上球員技巧差天共地，唔好話小範圍搓傳，一啲基本腳下球嘅處理都唔夠聰明，Busquets缺陣對巴塞中場有一定影響。Fred上半場甚至唔係好緊纏式嘅man mark對住Frankie de Jong已經凍結咗巴塞嘅推進；下半場有一段時間甚至有空間放低任務自我解放，而巴塞中場又好似無乜屏障力咁。
坦白講兩隊波個別球員表現麻麻（Wan-Bissaka、Kessie、Kounde都幾唔掂，再數就全隊架喇），整體發揮麻麻，場波有張力但質素真係唔算高。Rashford繼續處於form of his life，兩個入波本身連機會都稱唔上又比佢製造到入球，條友咁落去遲早贏埋Ballon d'Or...
提醒大家，歐霸已經取消咗作客入球，次回合返奧脫福點都要贏。