今場波有趣在，過程同結果往往可以係無關係嘅。特別係上半場，兩邊嘅final third質素相當低下，咁嘅情形下兩隊全場加埋都有5個入波。
Martial全場甩波多過貢獻，偏偏又有波入。曼聯下半場最順風順水嗰段，Rashford、Garnacho玩弄車路士個後防到崩潰，竟然不敵Kepa神勇同門柱，「只」能靠十二碼同對手低級犯錯入波。
當你以為車路士放棄咗場波，然後Felix又整球靚波嚟玩串個party。
上半場曼聯領先兩粒完全唔輕鬆。車路士唔知發生咩事作客嚟奧脫福同曼聯玩對攻，又居然收到成效。雖然先失一球死球，其後形勢壓倒曼聯，年輕左閘Hall今場表現亮眼，幾次睇準曼聯防線形狀被拉散就走位，要不是前場隊友唔生性最少都有一個助攻。話說回來車路士前場嘅把握力真係差得過份。
然後同曼聯主場順境波嘅劇本差唔多，上半場領先，下半場對手開始進退失據（今場加上車路士開始hea踢），後場多空位就換入Garnacho、再利用Rashford玩直線爆破。效果良好，一轉打法隨即成功拉開比數，好彩啲甚至入到多幾球，Game Plan係做啱哂嘅。
Sancho上半場有個出色嘅走位收鑊助攻，下半場出到嚟乘車路士後防多空位，節奏又唔快，表現又幾ok。但如果係要節奏唔快同多空位佢先表現好，件事又唔多ok。佢嘅定位喺球隊越嚟越尷尬，事實上曼聯成隊上下左右幾個位置都有一堆「特定情況下都會ok，但其他情況下又唔太夠用嘅球員」，感覺上Mount真係加盟都只係會落得差唔多情形。
前四已定，目光要放遠去睇足總盃決賽了。比較擔心係曼聯最近啲逆境波都無咩好下場，唯有希望曼聯對住曼城可以早段領先，班球員舒服好多。