唔少人唔明點解曼聯一口拒絕韋斯咸£20m報價，覺得曼聯「大貪，咁高人工有人要都偷笑」——雖則呢句係真，之但係用簡單數學話你知，曼聯真係無必要「為賣而賣」接受呢個報價。
（首先又要講下基本足球會計理論，如果你熟Amortization概念嘅可以skip呢兩段）
歷史背景係，當年曼聯用£80m（當差唔多先）買Maguire返嚟，簽約六年（加一年續約權）。並唔係話£80m計哂嗰一年支出就一了百了。計算上，呢個「買人」嘅支出係會用攤銷（Amortization）嘅形式，分配喺買佢返嚟嘅合約年期上。先唔講optional extension條款，簡單少少就咁以六年約為例，「買Maguire」呢個動作為曼聯2019-2025年期間，每年喺收益表上都會多咗大約£13m嘅支出。薪酬另計嘅，而傳媒推算，Maguire嘅年薪大約£8m。
至於Maguire呢項「資產」嘅價值，就會由£80m起計，每年扣除£13m，六年後合約期滿之日就係「剩餘價值」歸零之時。現時情況，Maguire已經喺曼聯度過四年，因此喺曼聯嘅剩餘價值大約係£27m。
喺會計原理上，賣球員當刻，會即時「結算」賣出嘅值錢用嚟抵銷球員嘅剩餘價值。
重點︰
假如曼聯今年以£20m賣出Maguire，扣除剩餘價值後，單計今年嘅收益表會錄得-£7m嘅轉會淨虧損，加返「節省到」嘅薪酬大約£8m，理論上成單交易曼聯嘅淨價值大約只有£1m，甚至更少。
以曼聯立場，我唔「賺」呢£1m，留Maguire喺陣中，會出現咩問題？答案係無問題。曼聯已經換咗隊長，明確踢佢落後備席，Maguire本身性格又唔係大吵大鬧嗰班嚟，留佢喺度（暫時）唔會對陣中球員造成負面影響，兼可以有多個有質素嘅後備球員做輪換或應急。曼聯唔係唔肯或唔想賣，但真係唔使為賣而賣嘛——今個夏天唔似再有下個後衛來投，多一事不如少一事，個人認為決定合理。
反而急嘅應該係Maguire。再無正選，英格蘭正選中堅位應該凍過水，令佢變得有機會接受大幅度pay cut求轉會；變相韋斯咸或其他追求者可能會有更鬆動資金用作轉會費，起碼喺今個夏天轉會窗內計，時間係企喺曼聯呢邊嘅。
順帶一提，曼聯其實係有一定嘅FFP壓力，啲deal要做就要幫到手，如果唔係不如focus喺其他deal度搾取更多淨價值好過，都係嗰句，現實世界買賣人唔同打機撳個confirm掣就搞掂架嘛，做嘢要有priority架嘛…
