今場勝仗有啲意料之外，雖然好大程度係因為阿士東維拉自己做得唔夠好，但曼聯都有做得好嘅位先贏到波。簡單幾小段文字講少少觀察。
首先維拉上半場狂走half space位，某程度上係Mainoo（同Casemiro）喺中場對防線保護不足所致。Mainoo對球隊運轉嘅幫助好大，但防守整體能力都未夠出色，Casemiro狀態今季一直都浮沉當中，今場中場形勢都輸咗一半… 無失生波託賴對手把握力大跌watt。
Ten Hag下半場嘅換人有啲令人意想不到，McTominay換走Rashford本身已經夠驚喜，當我諗緊點解會想叫前者會出嚟打多個中場，點知原來直接推佢上去做第二中鋒，同Hojlund分擔第一點嘅工作。入波係好大好大嘅鼓勵，「雙塔」箭頭印象中近幾季都少見。
曼聯自上場「齊章」開始，整體球隊運轉大有進步，今場Martinez又再受傷缺陣、Shaw疑似半場傷出、曼聯後場又回復返移動太慢以致「搓唔到出嚟」嘅問題。
個人唔係好喜歡「Bruno作為球隊不可撼動嘅絕對核心」嘅組軍同戰術方針。今場為例，Bruno喺下半場中段起，已經無用自己嘅強項為球隊作出貢獻。今場場面算大開大合，好幾下隊友喺邊路拎到波做反擊，Bruno礙於自己速度不足，「合理地」選擇留喺隊友偏後位置等波再分。假如佢肯前插走動，夠快嘅可以直接打反擊，唔夠快嘅最少都有拉扯作用，佢今場嘅存在不停拉慢反擊節奏… 唔好誤會，Bruno喺呢場波、以至大部份其他球賽都有重要貢獻（特別佢嘅精神力量都值得一提），但今場嘅下半場，特別係McTominay換入後，如果佢個位係Antony打，最少曼聯喺場面上唔會咁失勢先。
＊＊＊
計一計數，原來呢篇係差唔多個半月以嚟第一篇曼聯賽評，以「快車期」嚟講真係隔咗好耐。唔怕同大家講呢段時間小弟有啲因足球而起嘅小傷患同埋感冒都困擾咗好耐（老人家感冒係慢啲好），加上忙碌（永恆的藉口），無乜精神、無乜時間、無乜心情之下，唔好話寫文，連足球都少咗睇。雖然無乜commitment話呢度一定幾耐更新，我唔出文亦都應該唔會有人突然諗起「啊拾苟條友好似好耐無出文唔知佢係咪得罪人多被人隊冧咗」，不過係咁意都交代下最近（又）咁靜局嘅原因，同埋如無意外（例如今場贏波算係幾意外），嚟緊應該都唔會更新得太密。你當我休息又好、淡出又好、轉型又好（放心唔會考慮Patreon賣相），總之就同佳仔一樣，睇心情做人，多謝大家支持同諒解。
