阿仙奴對曼聯呢場絕對稱得上係「睇住嚟食」。呢句說話並沒有對曼聯含任何不敬之意，而係講緊阿仙奴喺戰術部署中完完全全掌握咗曼聯缺乏調配空間、限米煮到嘅限飯實在太少。直接了當、醜陋地作客奧脫福贏得三分。係阿迪達上年之前都仲係相當罕見嘅妥協。
呢場嘅曼聯幾乎已經去到「有11個人開波、22對腳完場」已經還得神落嘅嘅境界。講傷兵唔係要賣慘，係話你知曼聯可以選擇嘅game plan只有今年對強隊用足全季嘅「經典防反套餐」——即係閃電開局15分鐘、龜縮死守60分鐘、最後狂炸15分鐘。
但係呢個防反套餐嚟到今場根本唔夠料煮。全場得Garnacho獨力拍門，Hojlund努力牽制，Dalot以跑動盡幫。其他人唔係唔想一齊攻。無Bruno不停嘗試比最後一傳、無Rashford以速度攻堅（佢唯一適合嘅比賽類型就係有大量防反機會比佢浪費嗰種），Casemiro又要頂中堅變相中場得Amrabat連長波都無埋。
唔好忘記Garnacho、Mainoo本來就無90分鐘嘅體能… 最後嗰15分鐘「狂炸」降級到「掙扎」都唔太稱得上。
我呢啲唔識波嘅外行人都睇得出你個「經典防反套餐」無料到，你估Arteta同阿仙奴教練團隊睇唔睇得出？
明知曼聯只剩下一招transition可以用，阿仙奴就順水推舟交出控球，比個波你自己犯錯。將比賽節奏減慢，球隊隊形保持緊密，減少兩邊來回次數，自然可以減少空間比曼聯喺奧脫福打快速反擊——畢竟呢樣嘢阿仙奴係真心害怕嘅。
所以Arteta嘅戰術個人認為係唔好睇，但實用、意向明確。副作用係球隊習慣控球遠多於對手，部份球員明顯唔適應out of possession——害怕到Partey頭60分鐘都緊張到不行，連帶阿仙奴有好幾名球員都有失準。另外曼聯廢還廢，但你永遠唔知無啦啦幾時有下「波子機」打到手、或者kick到腳，一球上落輸個十二碼就無謂…
但事實係曼聯根本造唔出呢啲威脅。場面上可能阿迷會覺得場波踢得好差，但其實實質嘅博弈上，阿仙奴係盡在掌握。
坦白講個人係失望嘅，諗住曼聯會有理無理主場同阿仙奴鬥攻，我張「客其他」嘅飛先有錢收架嘛。順帶一提，半場客其他喺出場名單公布後10分鐘由250倍跌到125倍，班賭仔真係0尊…
