.
非常精彩。一開波兩隊嘅精神面貌都話你知自己想贏，呢樣嘢無關主守主攻等戰術事，阿仙奴擺到明要報首回合之仇；曼聯就想証明自己有力爭冠，呢啲為啖氣嘅比賽，有時仲好睇過太多計算同博弈。
.
作為曼聯球迷當然有輸波嘅失落，但個人而言又幾開心睇到場咁精彩嘅對決（特別係昨晚嘅利物浦對車路士仲難睇過之後場韋斯咸愛華頓）——精彩唔係指曼聯戰術、實力上如何拉成均勢，而係明知唔夠踢嘅情況之下，死咬住對手戰至最後一兵一率，起碼好過前季輸到死狗咁款。
.
老實講，開波頭10分鐘相信曼迷已經知道根本唔夠踢，中場線可以用「失陷」兩個字形容，Varane同Martinez狼孭解圍不下十次，好大程度係來至於Eriksen速率跟唔上、及McTominay位置感不佳嘅問題。喺度希望曼聯球迷唔好過份責怪兩位防中，Casemiro作為正宗防中嘅位置感係世界級嘅，今季曼聯唔少嘅精彩演出，都係因為有佢令ball recovery變得簡單，並提升轉守為攻質素，呢樣嘢係曼聯過去五、六季一直缺乏嘅，唔係話戰術改少少嘢就cover到。
.
阿仙奴，特別係下半場，最具威脅嘅進攻套路係右路half space嘅應用，特別係Saka配合佢附近嘅球員例如冨安健洋、Odegaard、Xhaka等人，將Shaw、Eriksen甚至後來加入嘅Fred之間嘅換防失誤同暴露嘅空間放到最大。Eriksen如上所言已經跟唔上步頻，但佢嘅防守位置感已經係幾位在陣中場入面最好嗰個，於是整個下半場就被弱點攻擊…
.
Wan-Bissaka嘅表現同平時差唔多，位置感、警覺性（特別係後柱）都極差；我又要講多次︰「Wan-Bissaka防守出色」係一個誤會嚟，佢嘅少量優點係1v1防守，今場亦成功封鎖Martinelli，但1v1只係一個後衛要面對嘅眾多situation嘅其中之一，更多情況下，你連單防嘅機會都無就已經失咗波。難聽講，如果話曼聯因為Casemiro缺陣而導致失勢，咁Dalot缺陣就直接導致曼聯失波。
.
暫時睇咗兩場越睇越唔覺得Weghorst呢位中鋒係買嚟入波，佢嘅迫搶同遮線意識甚至比曼聯唔少嘅中場球員做得好，佢喺中鋒位置嘅現位同面向更加似係做串連嘅工作，比身邊其他attacking talent去發揮之餘，亦比面Martial更適合做第一道防線嘅工作。
.
最後大方恭喜阿仙奴，呢場波絕對值得贏（唔同意呢句嘅球迷可能要睇睇xG數據），期待下季再鬥過，到時真係爭冠軍。
.
《英超︰阿仙奴 3-2 曼聯》全場完