作客不易，作客般尼茅夫更不易，曼聯今場「上半迫搶、下半反擊」嘅Game Plan藍圖，個人認為係成功嘅，但個別球員狀態真係搞唔掂。
曼聯整體表現後半季跌watt問題越嚟越令人不安。之前話中後場傷兵多都仲有得抵賴，今場前場三鋒頭Martial、Sancho同Antony，特別係前二者出賽根本唔算頻繁，竟然有活力不足嘅問題。般尼茅夫防守擺明打low block，非常依靠前場球員跑動去拉扯空位，結果Martial打箭頭一心想好似同Rashford打左翼時咁換位踢，但Sancho無居中嘅能力又唔想理佢，結果兩個就決定唔郁…
最燥嗰球其實係入波嗰下。Eriksen喺禁區頂作勢斬入去，一路等一路等一路等，足足兩三秒時間竟然可以無人理佢——Martial散步式由十二碼點行返出嚟，完全無前插嘅意慾，Bruno、Antony亦無意嘗試跑動。喂大佬，第八分鐘咋。好彩Casemiro嗰下意會到前插走位，最後射波嗰下精彩，更抵讚嘅係佢走埋班前鋒嗰份。
講走位，今場要讚嘅仲係Wan-Bissaka。世界盃返嚟之後，佢好似同上半季嘅Dalot靈魂交換咁。再加埋佢嘅體力上乘，上半場好幾下就係靠佢（嘅走動）帶返生右路同Antony嘅路線。去到下半場，後備入替嘅Garnacho比Sancho表現更佳，特別有幾下直接挑戰般尼茅夫右路防線，有成功有失敗，但最緊要係比人知你下下唔會原地delay等支援。當然，咁樣比較唔公平嘅，Ten Hag係睇準般尼茅夫開始想進攻嘅時機，後場有更多空位先換入Garnacho用速度爆破，Sancho上半場嘅工作係以保持形狀迫搶為主。
點都好，曼聯全取三分後，打少場領先第五名嘅利物浦三分，「爭四」之路尚餘一分就大功告成。
