本身Oliver場波吹得幾好，最後兩分鐘竟然都搵到位做主角，Dalot十秒內被兩黃一紅真係好笑多過嬲。
整體而言，基本上係兩隊中場鬥差嘅遊戲。曼聯Amrabat同Mainoo嘅防守企位好似無夾過咁，成日收得太窄，個人認為Amrabat唔太信任Mainoo，於是自製好多熱血迫搶鏡頭，但佢嘅能力根本無辦法做到高水平嘅橫移覆蓋，結果反而失位仲多；此外，Amrabat同McTominay有種唔想用波嘅心態，或者拎完波唔知可以去邊，呢個就係當曼聯要轉守為攻、或者拎住控球權時缺乏如Bruno類型嘅大腦球員嘅結果。
利物浦中場最令人失望嘅當然有Szoboszlai，有疲態、無狀態，另外Endo喺中路嘅對抗力麻麻，雖然佢回收唔少波，但當佢受壓嗰時整體利物浦嘅中場運轉欠流暢。前場移動皮球速度亦唔算為曼聯防守添加好多壓力，簡單嚟講就係拉唔到空位出嚟…
場波最好睇應該係下半場中段嘅比賽，雙方有意拉開三線空間破局，演變咗短暫嘅open game。但曼聯繼續欠缺一個正統攻中嘅組織力，幾下攻勢人少打人少連最後一傳都做唔好；利物浦幾下反擊處理都麻麻，finishing更加令人失望，更加唔使講角球搶贏咁多下頭鎚都入唔到一粒真係浪費機會之最。
今場曼聯幾個球員都抵讚，特別提及啲大家未必覺得好顯眼嘅︰Dalot下半場幾下build up嘅轉身係近期少見嘅嘢；Mainoo靜靜地塞咗好多空位，阻擋咗唔少分去half space嘅傳球路線；一對中堅嘅位置感都應記一功。
Onana被人鬧太多鑊，今場無咩表面好誇張嘅飛撲，主要係起始位置捕捉得幾好，冷推一下佢做曼聯一方嘅MoTM又何妨？
