回應返標題數據，曼聯今季第一次喺聯賽贏三球，咁都仲排到聯賽前列真係好好彩。
呢場發揮繼續唔算好理想，但難得有唔少值得慶賀嘅嘢。
第一樣嘢一定係講Mainoo。熱身賽表現本來已經非常耀眼，可惜臨開季傷出，今場終於見到佢憑咩打入一隊。18歲仔，防守企位同決定都合理到不得了，閱讀球賽亦相常不俗，今場決少Eriksen同Antony嘅情形下，Mainoo喺ball progression方面都交到功課——單講呢方面能力甚至算係後場算數一數二嘅球員。今日嘅Mainoo都不禁令大家幻想如果季初佢無傷，開季至今嘅曼聯中場會唔會無咁失勢呢？
第二樣嘢要讚Maguire同Onana兩位季初被受壓力嘅防守球員，除咗差啲老烏（又要多謝Mainoo幫你護空門），全場表現穩健有餘，上半場有一段Lindelof被Calvert-Lewen恰，下半場調整之後見佢進取咗同Calvert-Lewen對位；Onana幾個精彩撲救，連續三場clean sheet，可以為佢平反得未？
當然令人振奮嘅仲有Garnacho嘅世界波，好耐無試過因為個入波彈起身大叫… 呢球最少可以直接成為goal of the season contender吧。
讚咗咁多，但隊波嘅問題仲喺度。繼續用Lindelof + Maguire最大問題係後場build up唔會有運行，Onana、Shaw同Mainoo嘅用波能力感覺有啲被浪費；McTominay算係雙面刄——隊友持球時嘅現位同傳球質素有限，今場中場防守都麻麻，偏偏佢嘅後上前插有其威脅（第三個入波佢功勞好大）；Rashford嘅狀態同決定好似走咗入死胡同咁，曼聯今場有一半時間都處於下風，Rashford協防不足都係成因之一。
大勝一場，但射門數字係9對22，曼聯表現仲有好大改善空間…
