森林頭五分鐘先入兩球充滿偶然性，曼聯個別球員固然要負上一定失球責任，但其實雙方戰術上並未有太大優劣勢分野。Steve Cooper選擇用放棄控球死守反擊嘅方式「捱」90分鐘，Ten Hag相對而言就無咩變動，所幸嘅係曼聯球員心態崩潰咗一陣之後，好快就成功調整，加上球員本身狀態總算操返起——唔講戰果，最起碼個表現見得下人先。
曼聯季初（以至上季）做得最差嘅ball progression，而今場森林low block收得太low，曼聯唔使再諗點樣先可以辛辛苦苦咁將個波由自己後半場送上前半場，「只需要」諗點樣喺final third將個波送入網。當然呢樣嘢曼聯都唔係做得好，喂之但係曼聯班友仔爛船都有三斤釘，射嗰班finishing差射唔入你，但傳波嗰班穿透力都係有，圍都圍到你無氣。森林最後嘅真正死因，更多似係體能速率開始跟唔上，你睇完場嗰刻成班白衫攰到訓喺地下就知。
呢場對曼聯算係最好結果，反正有無紅牌、有無十二碼都實有人話黑哨，三分已袋呢啲算小事，重點係成隊有個機會打起狀態同信心，唔係講笑，今次魔性澎湃緊要過三分已袋呀喂。（留名睇人見我標題以為我一贏波就J懵咗）
