Rashford突然搖身一變成為全歐洲狀態最佳嘅前鋒，不止一次嘅訪問中，佢本人同領隊Ten Hag都話係「重拾信心」嘅表現。呢句當然無錯，但同樣值得深究嘅係，到底喺個人戰術同球隊戰術上，作出咗啲咩調整？
#重新投入最佳活動範圍
世界盃前一場對韋斯咸嘅聯賽賽後訪問，Rashford提到「Ten Hag希望我留喺啱嘅範圍、入球、壓迫對手。」所謂「啱嘅範圍」，大致可以分為「起動」嘅地方同「射門」嘅地方。眾所周知，Rashford比較擅長喺左路同左肋部（Half-space）活動嘅球員，Ten Hag自季初大部分時間都放佢喺4-2-3-1嘅左翼位置，而非Solskjaer或Rangnick咁一半放左、一半放右。而受惠於曼聯中軸得強援Casemiro、Eriksen以及Martinez（好多人唔記得咗Martinez對於曼聯build up嘅貢獻其實極大）加盟，中場推進較早兩三季穩定咗好多，變相作為翼鋒唔需要被逼長期回後拎波，Rashford相對上可以喺更接近中前場嘅左路同左肋部起動同迎接皮球。
世界盃後，由於C.Ronaldo離隊、Martial屢受傷病影響，Ten Hag亦會喺特定情況下將Rashford推至中鋒位置攻堅。受惠於其速度，Rashford同對手防線並排走身後位嘅能力，令曼聯得以喺攻守轉換階段保持最大威脅。
上面提到C.Ronaldo離隊，好多人取笑C.Ronaldo一直喺度阻住Rashford搵食，或多或少都無講錯——再深入一層咁講，主要係Rashford同C.Ronaldo嘅偏好射門位置有啲重疊，雖然後者嘅firing range非常遼闊，但多咗一個人走「埋齋」位就必然對另一人有所影響，所以入哂佢數又有啲唔公平；再者，Rashford喺大師兄身上係有學到嘢。最近期嘅例子係Rashford攻入反勝曼城2-1嘅入球，Rashford一直企喺offside position等傳中，呢個係C.Ronaldo嘅招牌貨之一，而早年嘅Rashford係好少識得呢啲位。
配圖算係引証咗呢個論點。圖中顯示過去四季Rashford起腳射門位置嘅heat map，可以見到，今季佢嘅射門位置非常集中喺左肋部禁區內，對比起上兩季，分散咗唔少喺禁區外嘅浪射，位於右路嘅射門亦限制咗右腳球員可以動用嘅射門技巧。此外，射門平均距離係四季以來最短（15碼）、以及每個射門嘅平均xG亦係四季以來最高（0.16），直接反映Rashford今季得到嘅埋門機會同質素皆遠超以往。
#前場決定及個人技術相輔相成
早一兩年好多人笑Rashford係「人堆福」，因為佢只要喺前場拎到波就二話不說向人堆裡衝，妄想自己可以扭過兩三個人強行突破對手防線。今季嘅Rashford嘅前場決定「突然」聰明咗好多。當然作為局外人無辦法知道Ten Hag同佢嘅教練團點樣幫佢進行換腦手術，但大致嘅推測係︰一、曼聯進攻路線同走動清晰咗，令佢明白自己多咗選擇；二、Rashford自己本身嘅技術有提升。
特別想講多少少第二點。個人印象，Rashford嘗試多咗好多單對單嘅盤扭突破，但睇返數據又啱啱相反。今年佢嘅場均盤扭嘗試只有3.6次，係有紀錄以嚟第二低；甚至場均觸球次數都係有紀錄以嚟最低（37.7次）。呢個印象可能純粹來自成功率高，同埋湊效。Rashford今年嘅盤扭絕對有進步，其一係得益於佢嘅肩傷痊癒重拾爆發力，令佢可以更頻密施展變速盤扭（tempo dribbling）；其二係因為隊友為佢開啟發多選擇，佢有條件喺啲一對一嘅情況，混合更多盤扭方向，即無論向外、向內嘅盤扭皆可，後衛就好難捉路防守。昨夜對巴塞隆拿2-1嘅入球，就係乘Raphinha「捉」佢向場內跑失敗，轉向向外盤扭而成功製造入球。
#釐定戰術角色定位不局限於位置
順帶一提，作為翼鋒，呢個盤扭同觸球數字係明顯過低，反而同正前鋒睇齊。顯然，Rashford喺球隊角色已逐漸確立成finisher（入球者），而非普遍翼位球員嘅帶球者（ball carrier）。而事實上Rashford嘅入球數喺過去幾季都領先期望入球值（xG），幾位領隊都曾經大讚佢係「埋門技巧最全面嘅球員之一」，而過去兩季入球數字低落，可能只係因為供應太疲弱。
——繼上篇講右閘嘅文章，一再証明場上位置同球場角色，不盡相同。最近有觀看曼城比賽嘅球員，都會更明顯地見到哥帥攻、守嘅排陣可謂截然不同。排陣嘅數字係死嘅、人係活嘅，現今睇足球，大家要留意多啲唔同比較階段嘅舖排，而減少期望球員單純以「足球機」形式應對球場上嘅所以變數。
最後當然要講返一開頭所講嘅信心。足球同心理本來就係一樣好微妙嘅嘢，有信心時你可以做到啲之前做唔到嘅事，而進步亦可以培養更強信心，作為球迷自然樂見此等正向循環，在此寄語Rashford繼續進步，派飯之餘不忘入多啲波。
*******
上文參考咗The Athletic文章嘅部份觀點及數據，文中亦有唔少相關比賽截圖闡述其觀點，有興趣嘅朋友歡迎細閱︰
https://theathletic.com/.../marcus-rashford-manchester.../
配圖改自同一文章插圖。