公海包括曼聯專頁有唔少人認為「Antony用rainbow過人挑釁對手令對手憤怒引起衝突，間接累Casemiro紅牌出場」。有感而發。
我最大疑惑係：點解rainbow過人係就要被鬧？
印象中第一次聽呢種言論係Neymar喺法甲用rainbow過人，被球証以黃牌警告。即使我唔鍾意Neymar，但我覺得成件事係智障。Rainbow係一種花式技巧，本身並無違反體育精神嘅意思，成功咪就係有效嘅過人方式囉，而且仲好型。後衛自己技不如人被過，點解就叫挑釁、不獲尊重？施丹轉身算唔算挑釁？朗拿甸奴牛尾巴算唔算？直角假身算唔算？插花算唔算？其實扭過對手、入波、對手都會唔開心，點解單獨係rainbow呢種過人方式特別受人譴責？會唔會只係被過嘅人自尊心太薄弱？
退一步，就算Antony有意挑釁對手，咁又點。挑釁從來都係比賽一部份嚟，君不見場上幾多球員瘋狂trash talk？未必光彩，但只要行為本身無涉及犯規動作，球例不會予以阻嚇，甚至，假如成功引到對手動手繼而被罰，可以算係成功嘅戰術。Schlupp抵唔住頸動手推佢，係Schlupp嘅問題，佢應該受到制裁，Antony嚴格嚟講係戰術成功，亦係暴力嘅受害者；同樣Casemiro疑似叉頸，都係佢自己控制自己肢體動作嘅責任，點解Antony嘅一次嘗試突破（雖然唔成功），就要佢要承受Casemiro衝動嘅責任？
（喺度先唔討論Casemiro係咪真係有叉頸、同埋其他水晶宮球員嘅疑似打人動作）
作為邊隊球迷都好，我唔會去怪責自己球員（更何況佢今日打得唔錯），咁樣完完全全係blame the victim嘅所為...