上回講咗曼聯賣人表現不過不失，事隔咗都差唔多三個星期。咁耐先出下集其中一個主要原因係小弟去咗日本旅行，呢篇文都係喺回程航班度打。順帶一提，Hong Kong Airline已成垃圾航空公司，In-flight Entertainment部電視來回兩程都壞，唔四五個鐘嘅航線都唔serve飛機餐淨係得個勁撚難食嘅菠蘿叉燒包，然後回程我坐緊呢個位張椅同餐盤啲鏍絲都係鬆嘅，坐坐下會無啦啦個人跌向後；諗住撳鐘叫空姐嚟解決下？Sorry原來啲制都係壞嘅。我已經唔知佢比HK Express之流嘅廉航仲有咩優勝之處要收貴千幾蚊，下次嚟日本比貴少少坐ANA算鳩數，屌你老母。
返正題，去點評轉會窗，除咗單純地講球員能力、適唔適合呢個問題（亦係最難答嘅問題，有時踢咗半季都未必知馬力，何況而家只係過咗六場波），亦可以由選兵策略、談判部署等角度思考。
作為曼迷，已經有好幾年對曼聯轉會策略感不明所以，例如明眼人一睇就知要買防中都拖咗三四個轉會窗先買到人；又或者一口氣買幾個差唔多位置同年齡嘅刮刮卡（Dan James、Pellestri、Amad Diallo）；仲有死追爛追一個轉會目標到最後得個桔，呢啲怪異操作竟然喺近呢一兩個轉會窗近乎絕跡，係個價錢難搞少少，喂，算好有進步架喇。
今個轉會窗最值得讚賞嘅係，曼聯好早就明確知道要乜，亦總算有個清晰嘅priority，知道先後次序：有邊個位置嘅人一定要買優先處理，邊啲位無咁急，邊啲係nice to have。而每個位置都有一系列嘅名單，首選係邊個，談唔成嘅話搵邊個。看似好基本？對曼聯嚟講唔係...
結果而言，曼聯買到一個為幾年後接班Casemiro、Eriksen、Bruno中場線作準備嘅年輕中場（Mount）；買到己隊急需而且市面上相當缺乏嘅正中鋒（Hojlund）、過程有少少庸人自擾但最後都叫做成功購入有一定用波能力嘅門將（Onana）。另外因Shaw受傷而喺Deadline Day決定借入嘅Reguilon、同埋因為賣人不果而買唔到最後變借入嘅Amrabat（連收購條款）、免簽Evans、後備門將Bayindir，未必係長期正選material，但算係成功短暫為球隊解決燃眉之急。
而可能因為上年曼聯嘅成績、表現都唔錯，有盃捧下屆有歐聯，唔少目標對加盟曼聯嘅戒心都降低咗。上年FDJ扭足一個夏天屎忽花，今年曼聯要嘅人基本上都買到。特別抵讚嘅係買前鋒，Kane顯然比較適合曼聯需要，不過曼聯好早發現Levy根本無意以合理價格放售（起碼唔係賣比英超球會），就果斷轉移視線至Hojlund身上。諗起當年被多蒙特挾Sancho玩足三個月，都係嗰句：終於識臨崖勒馬對曼聯嚟講唔係基本嚟架⋯
美中不足嘅係談判技巧。早前出過文，覺得買Mount嚴重overpriced，特別係佢本身有意離隊、車路士急需賣人套現嘅情況下，Mount嘅成交價真係偏高，最令人失望嘅係中間嘅談判技巧，曼聯一方面怕自己公開下一個target會被hijack；一方面又被車路士睇死佢非Mount不取就咬實個價，最後曼聯不停被迫提高報價去高追。
單純睇市場供求，Hojlund同Onana嘅轉會費個人認為合理嘅。
此外，完成交易嘅時間都有進步空間。尤其當你見到阿仙奴、曼城六月幾乎完成增兵，曼聯deadline day仲喺度買緊人，話就話最後都買到，不過人哋有多兩個月時間集訓夾隊形夾戰術，曼聯買呢幾個人預咗佢哋會成為球隊骨幹，早定遲買完人，真係會對成績有影響。
咁人選呢？引用上文講，幾場睇好難作結論，個人感覺，單用類型計，Hojlund同Onana都可能算係正確選擇，Mount我暫時仲未睇到Ten Hag想佢做乜，所以好難評論，個人審慎悲觀，最擔心佢心態狀態都操唔返起成為下個Sancho。至於喺呢個類型底下，有無更好嘅option，坦白講小弟就唔敢講了。
最後奉勸一句大家唔好因為幾場波嘅失利去總結一個轉會窗。特別係三個主要收購都有少少for the mid-term future嘅味道，加埋傷停季初熱身安排不當等問題，建議睇定啲先鬧。
再最後奉勸多一句，真係唔好搭Hong Kong Airline。
