識我本人嘅朋友應該都聽過我咁講，下半季以嚟，炒唔炒Ten Hag其實我係持大約50-50嘅態度（難聽講即係「是但」）。支持炒嘅原因可以有好多——球員傷病佢都有一定責任，傷病問題對球隊有影響，但Ten Hag大部份時間都無好好用限米煮好限飯，更多係見到佢叫大家一齊食生米就算。再者，Ten Hag作為領隊嘅能力，唔係無，但就絕對未出色到可以忽略以上嘅問題。
支持唔炒嘅原因，更多係因為「炒了又如何」。由Glazers未退場、去到INEOS入主、即使到而家新管理層都仲未正式埋班。個人一直覺得管理層、老闆們係大方向決策者，你下面嘅人好出色，係有機會改善到短期問題，但曼聯近年上上下下嘅表現都話比大家知，球會嘅詬病係全方位的。講明啲，就係上面嗰堆CEO、Sporting Director之類未搞掂個架構同大方向，就唔會有明確嘅「地圖」行向正確方向，下面點改都只係摸石過河。中間可能唔小心捉到啲魚，但單靠一堆好嘅船員，就係唔係可以變所向無敵嘅大漁船呢？
不論係講緊領隊人選、教練人選、醫療、球探部門設置，抑或係球員嘅人選同戰術，有個好嘅大方向，成功機率會大增。
炒咗，咪又係鳩請條友，重覆返前幾年嘅輪迴，分分鐘衰過唔炒。呢個係當初嘅「50-50」前設。
足總盃決賽後，個人傾向多咗唔炒。可能變咗「40-60」左右。
絕對唔係因為足總盃一役令我重拾對Ten Hag執教能力嘅信心，佢嗰句「如果我哋齊人 ，聽日一定會好天架」其實比我感覺係不負責任——喂大佬唔齊人都要過日子，落雨你都要搵把傘嚟擔架喎喂…
但支持唔炒佢嘅原因係當決賽前謠言滿天飛嘅時候，球員仍然上下一心咁執行一致嘅戰術（除非你同我講呢場個戰術配置者係另有其人），而唔係各向諗方法、以一盤散沙嘅形式嚟「單純為咗波衫個徽章賣命」。賽後球員主動將奬盃傳比Ten Hag捧盃（試想下你成功完成一個大project會唔會比credit你老細？如果真係關係惡劣嗰啲，你就算幾有禮貌都唔會喺眾人面前「啊，呢單嘢真係靠老細領導有方呀哈哈哈」），某程度上顯示更衣室對Ten Hag仲有相當大嘅向心力。
而呢個時候去炒一個有更衣室支持嘅領隊，帶比繼任者嘅麻煩同壓力會好大。
同當初換De Gea做Onana時嘅情形差唔多。Onana下半季表現幾好無人講，尋晚球咗兩球靚波無人講，落地慢咗即刻有一班人出嚟話「Onana真係好撚廢」。
利申多句，唔係因為贏咗個盃，等如可以對Ten Hag嘅領軍質疑一掃而空。長遠嚟講，Ten Hag應該都係要換（I'm more than happy to be proven wrong），但時機係一個大學問。最理想係上面班人已經搞掂哂啲架構，傾好哂未來十年嘅大方向先炒——不過呢樣嘢最最最少都半年。如果要急住喺呢個夏天炒，應該係搞掂哂上述事情，要趕住搶碩果僅存嘅適合人選，否則現役領隊去留問題，其實無乜必要喺呢個時候——等別係更衣室向心力咁強嘅時候——花太多時間討論。
