由四月開始傳Kane、五月開始傳Mount，完球季就一時又金玟哉，一時又Onana，近排好似Neymar同Mbappe都有份，今年夏天一單done deal都未有，「傳曼聯」陣容前中後連門將都齊哂腳，連班主都有兩組比你揀。傳媒利用曼聯呃點擊率一早唔係新聞，難得嘅係今年連球迷都一齊興奮。
想manage返大家期望︰唔好被「今年曼聯係近Ｎ年最佳」嘅標題蒙蔽雙眼，望住而家隊曼城、阿仙奴、甚至季尾回勇嘅利物浦，喂，現實返少少，出年目標應該繼續爭四，唔係爭四冠，諗下有隻盃仔捧都可以，但都要靠一定彩數。突登咁講係因為呢樣嘢影響到出年轉會窗嘅部署︰爭冠球隊可能諗緊增添Plan B打法、擴展板凳深度；如果係曼聯、紐卡素、利物浦之流球隊嘅情形，陣容都仲有明顯調整空間，其實有需要提升現有陣容質素；甚至需要投資年輕球員，為再過後幾年（如果真有幸衝冠）舖路。
而曼聯係極有需要為未來作準備。
如果你睇返今年嘅「勝利十一人」，中場嘅Bruno、Casemiro、Eriksen，分別係28、31、31歲。兩季後同一條中場線到底仲可唔可以應付到四線作賽？中場嘅年輕球員明顯未有能力接班——呢個亦係上季Casemiro done deal後我提出嘅最大concern。質素係有，影響力係有，但踢到幾多季？重建球隊中場核心一直係曼聯中場多年未竟之功，先唔講Bruno；Casemiro同Eriksen兩個位一定要搵年輕球員（轉會市場或訓練場都好）接班——今季最少買一個、下季最少要再買一個，畢竟信賴Hannibal、Mainoo等青訓產品風險仍然好高。
所以某程度上唔難理解點解Ten Hag想買Mount︰英人、年輕、踢法多元、有英超經驗。嗱，至於佢值唔值75M（甚至只係40M）呢個價錢，同埋係咪真係擔到大旗接Eriksen班，個人就唔睇好嘅…
另一個急需補強嘅位置係中鋒，C.Ronaldo離隊後曼聯情急下搵借將Weghorst頂替，拼勁十足，質素有限，轉會市場重開，曼聯自然寧願喺第二啲地方搵人。同中場位置唔同，曼聯攻擊球員年紀唔大，所以就算當初搵Harry Kane絕不叫人意外。不過熱刺無意賣Kane（最少唔會賣比英超對手），嗰個年代嘅中鋒又好少符合曼聯要求——結論應該都係會搵個年輕嘅返嚟圍威喂… 至於係邊個就到時簽到先算啦…
後衛嚟講，急切性不大。Maguire係現時球隊第四中堅，假如佢離隊固然要買人頂上（同埋可以釋放薪酬空間，一定係好事），26歲嘅金玟哉自然係人選之一，兼且會為球隊帶來一定程度嘅質素提升，其中一個最吸引之處係佢有release clause，「只要」同球員傾好個人條款，轉會費同轉會談判唔會有太大變數。但最近好似話拜仁出嚟搶，而曼聯除咗近年成績差，招攬球員嗰班說客又不知所謂，只要有人出嚟爭都可以打定輸數。
最後講De Gea。我講足一年︰De Gea唔差，亦只係唔差，因此曼聯有機會會比想像中早要換門將；至於係唔係今年，個人覺得又未必係。喺中場、中鋒呢個兩個位置有明顯補強需要嘅情況下，De Gea今季演出雖不穩定但整體可以接受。曼聯暫時無咩必要大灑金錢去追逐另一個門將。當然，前提係續約一事傾埋欄，De Gea合約仲有兩星期就到期，曼聯如果喺6月30號之後都未續得成約兼門神話要離隊，門將就變成買人名單嘅第一位，然後就肯定被抬價抬到亂七八糟…
所以結論係，無咩結論。都係嗰句，錢又唔係我出，今年買咩人都好，出年都未有資格講重奪英超。支持就實支持，之但係，真係無咩值得特別興奮…
