絕殺反勝係熱血嘅，McTominay兩球靚波（真係靚）算係為曼聯爭返啖氣，某程度上呢場波曼聯的確係更值得拎三分——至少賓福特整體表現無咁值得攞哂三分先。
賓福特今季開初令人失望，Ivan Toney嘅停賽本來都仲頂得住，加埋Rico Henry重傷基本上斷咗球隊半臂。賓福特比曼聯前壓得太輕鬆，連Maguire + Evans呢對組合打highline 都無受考驗，Martial直接頂替左閘Lindelof之後曼聯直接打少個左閘都無甚驚險鏡頭。縱然今場防守紀律性仍在，整體製造嘅威脅同場面都缺乏說服力。
曼聯嚟講，左閘接二連三受傷，今場終於唔再用Amrabat客串左閘將佢重新移返中路，左閘改用Lindelof，自然係缺乏攻力，因為無人疊瓦，無人拉half space，亦直接影響Rashford喺左路嘅發揮，呢個問題都已經好幾場，Rashford亦步入負面輪迴，基本上佢除咗喺邊路或禁區角等波到、之後一扭三失敗之外，無球走動同隊友配合都甚少，做決定變返兩三季前咁。Garnacho入替後左路明顯生返好多。
當然佢嘅表現受惠於Antony復出。曼聯無咗佢前幾場都有推進問題，本來右路由平平無奇（咗好多場嘅）Mount負責，Antony同時打通返右路嘅推進。當然，整體都唔係打得好，最後入兩球坦白講都係kitchen sink approach射入，組織戰術通通欠奉。
不過往好方面睇，今場Ten Hag終於因為球員傷停問題作出妥協，以Maguire + Evans基本放棄後場搓傳（上半場試咗陣即出事），半場收起Casemiro、60分鐘收起Rashford呢兩個早幾場都唔敢咁做嘅換人調動，最後成功止血，唔止場上球員，對教練團嘅信心都有幫助。
