假如真係「高雲地利作為underdog發揮好出色，將士用命擊敗曼聯」我會服氣同埋認為佢哋well deserved all the credits，衰就衰在… 其實高雲地利喺追成2-3之前場面可謂乏善可陳，技術差一截、戰術上唔見得有咩brilliance針對曼聯。反而曼聯下半場三球領先後，以逸待勞嘅game plan更有利可圖——你焗攻，我比個波你，我成堆快馬打transition，合理又聰明。
以上唔係輸到傻咗，唔係葡萄，而係足球就是這麼一回事。可能係偶然嘅運氣，可能係累積嘅士氣，無論咩原因突然出現嘅入波，足以將天秤傾斜。
曼聯第一個失波有一定程度嘅後防鬆懈同埋客串中堅嘅Casemiro錯位所致，高雲地利前場迫搶嘅努力當然不能抹殺，但講到第二個入波就係幾乎係完全嘅運氣使然了。有趣嘅係，士氣此消彼長，加上曼聯場上嘅球員一係就連續頂咗好多場、一係就啱啱康復，總之體能急跌（Onana好早開始浪費時間，直到加時打和都浪費緊時間唔係無原因），喺大約80分鐘打後，基本上形勢先開始慢慢平衡…
足球嘅重點係你抓唔抓得住個天秤嘅動能，將結果都拉向你嘅一方。
夾硬講啲美麗故事標題話高雲地利踢得好，事實係講唔過去，至少喺75分鐘前如是。雖然高雲地利今場波咁追到2-3，可以追平就係用士氣催谷嘅kitchen sink approach再換到運氣嘅禮物。本身我嘅諗法係「踢得西而最後階段唔知點樣撈到個入波，今季曼聯做唔少，只係咁啱今場要還。」
直至加時，高雲地利嘅精神面貌同針對曼聯兩閘work rate嚴重下跌嘅部署，我先真正開始覺得，高雲地利呢場波有值得贏嘅地方。
然後當我心底裡有少少想高雲地利贏波嗰時，VAR救咗曼聯，但救唔到曼聯同曼迷嘅面子。最後十二碼高雲地利被淘汰，我係打從心底覺得可惜。
因為，曼聯throw away a 3 goal lead in a semi final is still a f____ing crime。無論咩情況都係，而單憑呢樣嘢，曼聯亦都唔值得出線嘅。
嗱，雖然上述大方向game plan我係同意，但執行條件真係不足。之前有講過Bruno嘅問題，今場Bruno嘅速度所限，令有好幾球反擊打唔成；我唔質疑Rashford嘅投入度，但佢個腦真係不敢恭維，下下都走入人堆，下下都夾硬想推多步比自己做最後一射/一傳，全晚最大貢獻就係推甩咗球反擊比Bruno後上射入成3-0，難聽講，Amad出嚟第二分鐘嘅貢獻已經多過佢。
Casemiro級數係有，問題個位置感喺中堅位就係唔適合。去到加時階段仲留佢喺場上，無氣、無力、無態要佢客串高位中堅，最後傷埋，盤骨都擺唔到都仲要佢射十二碼，基本上已經構成虐老罪…
將（較）擅長防反Garnacho換離場，入替嘅Antony其實唔適合打防反；Mainoo被換走後中場崩盤失波失分，印象同實際上都好幾次。以往會搵Amrabat；今場搵咗Eriksen，雖然係因為真係無選擇，要夾硬叫佢打open end game，但難聽啲講，唔合格就係唔合格，現實就係最後差啲輸鳩埋。
以上過失，你可以話係Ten Hag嘅錯，亦可以話係限米煮唔到限飯，真係睇你選擇想相信啲乜。例牌答案︰大家都有份整污糟煲湯，就唔使分咁細啦。
所以結論就係曼聯鳩下鳩下就無哂3-goal cushion，但最後又負負祿祿捱到出線。最不滿係搞咗120分鐘，結果face無咗、覺又無得訓，文又要打，過幾個星期又要睇多場決賽，決賽又實輸比曼城，好心不如順水推舟比高雲地利入去搏一舖都好嘛…
