開局尚算不錯，McTominay頻頻喺中堅同防中之間搵到空位攻擊，甚至有一段曼聯穩定地喺前場控傳導致曼城要退守半場，點知輸咗一個尺度叫人摸不著頭腦嘅十二碼——有動作、有接觸，點都唔可以話係誤判，單純係soft到不行，呢個入波令曼聯突然安靜落嚟，都算係破壞成場波嘅部署，就算係中立球迷本住睇好戲嘅心都應該感到可惜吧…
當然，落後還落後，自身有無值得做得更好嘅嘢呢？Onana三番四次嘅撲救當然算係警號之一，後場缺乏邊路同half space嘅保護，前場想以行軍速度爆破中路亦不成，偶然創造嘅機會把握力又不足，上半場入唔到波係可惜；但只輸一球亦係幸運。
縱使眾多不是，真正令曼聯萬劫不復嘅，其實係半場Ten Hag嘅調動。個人一直覺得Ten Hag上季唔少球場嘅game plan management同調動都做得唔錯，近兩三場波球隊表現即使唔出色，最少佢行pragmatism向現實低頭係正確選擇，今場開波仲覺得佢棄用Mount、Antony算係有趣兼似乎有效嘅想法。Amrabat上半場打防中唔算出色，但稱職，即使有黃牌在身，個人認為佢都不能換走，希望賽後有人話我知Amrabat係受傷，如果唔係真係解釋唔到點解Ten Hag要自毁長城。
入替嘅Mount打McTominay喺上半場打得非常出色嘅位置，然後將McTominay推後落防中位，如此一來因為資源錯配，兩個位置都削弱哂。半場無耐已經話B.Silva會變得更危險，話口未完佢就喺McTominay面前助攻比Haaland，真諷刺。
之後基本上都唔使睇。唯一提下，Onana唔少撲救都見到佢重拾信心，位置、判斷、腳步都開始上力，但對手真係搞唔掂，呢個相信係實力所限，往往將個波好細膩咁接實、撲出界而唔係撲出場區之類嘅嘢明顯係做唔到，呢樣嘢曼迷可能要習慣下。當然了，今場失少過五球佢嘅功勞係大，整體表現係抵讚。
